Ўзбекистон Президенти Шавкат Мирзиёев 27 декабрь, жума куни Муҳаммад ал-Хоразмий номидаги мактабда ёшлар билан ўтказилган учрашув давомида ёш оилаларнинг эрта ажралиши ҳолатларининг кўпайганидан хавотирда эканлигини маълум қилган. Бу ҳақда «Gazeta.uz» хабар берди.
2019 йилнинг 11 ойи давомида 277,4 мингта никоҳ қайд этилиб, ажралишлар сони 28,7 мингни ташкил этган. Президент бу борадаги вазият жуда ачинарли эканини қайд этган.
«Уч йил давомида институционал муаммоларни ҳал этишга қаратилган жуда кўп ҳужжатлар ишлаб чиқилди ва тасдиқланди, аммо ажралишлар сонининг ўсиш даражаси йилдан йилга ортиб бормоқда», — дея таъкидлаган Шавкат Мирзиёев.
«Ажралишларнинг сони ўсишда давом этмоқда. Ҳамма жим… Хотин-қизлар қўмитаси, «Оила» маркази, «Маҳалла» фонди ўз ишини аъло даражада амалга ошираётгандек, аммо… сайловлар, сайловолди учрашувларда ҳам бу масала кўтарилмади. Нима бу ҳеч кимга тааллуқли эмасми?» — деган Президент.
Давлат раҳбари Хотин-қизлар қўмитаси, Вазирлар маҳкамаси қошидаги «Оила» маркази, «Нуроний» фонди, Фуқароларнинг ўз-ўзини бошқариш органлари фаолиятини мувофиқлаштириш республика кенгаши ва бошқа масъул идоралар ажралишлар сонини камайтириш борасида тегишли ҳаракатларни амалга оширмаётганини танқид қилди.
«Ушбу йўналишда илмий асосланган ечим ва тавсиялар йўқ. Ҳеч ким ташаббус кўрсатмайди. Ҳокимлар пахта, ғалла ҳосилининг мўл бўлгани ҳақида хабар қилади, энди ушбу йўналишдаги ишлар бўйича ҳам ҳисобот беришсин», — деган Президент.
Шавкат Мирзиёев 2020 йилда «Йилнинг барчага ўрнак ёш оиласи» республика танловини ўтказишни таклиф қилди. Бундан ташқари, ушбу ташкилотлар маслаҳат кенгаши тузиб, ажралиш ҳақидаги судда кўриладиган ишлардан олдин ташкиллаштириладиган яраштирув комиссияларидан кўра самара берадиган услубда муаммо билан курашиши режалаштирилган.
Давлат раҳбари Хотин-қизлар қўмитаси, Вазирлар маҳкамаси қошидаги «Оила» маркази, «Маҳалла» ва «Нуроний» фондлари раҳбарларини яраштирув комиссияларининг қониқарсиз фаолияти юзасидан таклифлар билдирилмагани учун танқид қилди ва «аравани торта олмаган»лар ўрнини бўшатиши мумкинлигини эслатди.
Президент аввал ёш оилаларни уй-жой ҳамда иш билан таъминлаш имконияти бўлмагани, лекин ҳозир бу борада вазият ўзгараётгани ажралиш борасидаги иш судда кўриб чиқилиши, оиланинг бузилиб кетишига бефарқ бўлмаган жамият ва фидойи раҳбарлар кўпайиши кераклигини таъкидлади.
Давлат статистика қўмитаси маълумотларига кўра, 2017 йилда никоҳдан ўтиш ва ажралишлар сони 306,2 мингга 31,9 мингни, 2018 йилда 311,3 мингга 32,3 мингтани ташкил этган.
Изоҳ (0)