«Инвестициялар ва инвестиция фаолияти тўғрисида»ги қонун Президент томонидан имзоланди, деб хабар бермоқда «Ҳуқуқий ахборот». Қонун билан таянч тушунчалар жорий этилди, асосий принциплар белгиланди.
Жумладан, қонунийлик, ошкоралик ва очиқлик, инвестиция фаолиятини амалга ошириш эркинлиги, инвесторларнинг виждонлилиги презумпсияси кабилар инвестициялар ва инвестиция фаолиятининг асосий принципларидир.
Қонунга кўра, инвестициялар мўлжалланган объектига кўра капитал, молиявий ва ижтимоий турларга бўлинади.
Инсон салоҳиятини, кўникмаларини ва ишлаб чиқариш тажрибасини ривожлантиришга, шунингдек номоддий бойликларнинг бошқа шаклларини ривожлантиришга киритиладиган инвестиция ижтимоий инвестиция ҳисобланади.
Шунингдек, қонун билан инвестицияларни амалга ошириш шакллари, инвестиция ресурслари белгиланди.
Хусусан, пул маблағлари (шу жумладан чет эл валютаси) ва бошқа молиявий маблағлар, шу жумладан кредитлар, пайлар, улушлар, акциялар ва бошқа қимматли қоғозлар, кўчар ва кўчмас мол-мулк ҳамда бошқа объектлар инвестиция ресурслари жумласига киради.
Бундан ташқари, қонунда инвесторнинг, инвестиция фаолияти иштирокчисининг ҳуқуқлари, мажбуриятлари, инвестиция фаолияти субъектларининг ҳуқуқий кафолатлари мустаҳкамланди.
Унга кўра, давлат инвестицияларнинг Ўзбекистон қонун ҳужжатларига ва халқаро шартномаларига мувофиқ ҳимоя қилинишини кафолатлайди. Инвесторларнинг инвестициялари ва бошқа активлари национализация қилинмайди.
Ушбу қонун расмий эълон қилинган кундан эътиборан бир ой ўтгач кучга киради.
«Инвестициялар ва инвестиция фаолияти тўғрисида»ги қонуннинг тўлиқ матни билан қуйидаги ҳавола орқали танишиш мумкин.
Изоҳ (0)