Toshkent shahar Bektemir tumani 105-saylov uchastkasi komissiya a’zolarining bir qancha saylov byulletenlarini saylov qutisiga tashlab, saylov natijalarini soxtalashtirishga urinayotgani aks etgan video paydo bo‘lgan edi.
Shundan so‘ng Bosh prokuratura mazkur holatni tekshirishni boshlagan edi. O‘rganish natijasiga ko‘ra, 105-uchastka saylov komissiyasining 22-dekabrdagi saylov natijalari bo‘yicha qabul qilgan qarorlari bekor qilindi va haqiqiy emas deb topildi.
Bosh prokuratura tomonidan ma’lum qilinishicha, 2019-yil 22-dekabr kuni Bektemir tumanidagi 105-sonli saylov uchastkasi komissiya a’zolari saylov vaqtida kuzatuvchilarning xonadan chiqib ketganligidan foydalanib, saylov qutisiga bir nechta saylov byulletenlarini tashlagan.
Shuningdek, komissiya a’zolari ovozlarni sanab chiqish natijalari to‘g‘risidagi bayonnomada komissiya a’zosi hisoblangan R.Mahkamovning imzosini soxtalashtirib, O‘zbekiston Respublikasining saylov to‘g‘risidagi qonun hujjatlarini buzgan.
Mazkur holat yuzasidan Bosh prokuratura tomonidan Jinoyat kodeksining 146-moddasi (saylov yoki referendum tashkil qilish, ularni o‘tkazish to‘g‘risidagi qonun hujjatlarini buzish) bilan jinoyat ishi qo‘zg‘atilib, dastlabki tergov harakatlari olib borilmoqda.
Bektemir tumani saylov komissiyasi tomonidan 18-Visol saylov okrugida 2020-yil 19-yanvar kuni takroriy saylov o‘tkazish to‘g‘risida qaror qabul qilindi. Shuningdek, tuman saylov komissiyasi tomonidan 105-uchastka saylov komissiyasining tarkibini almashtirish ishlari ham amalga oshiriladi.
Izoh (0)