Тошкент шаҳар Бектемир тумани 105-сайлов участкаси комиссия аъзоларининг бир қанча сайлов бюллетенларини сайлов қутисига ташлаб, сайлов натижаларини сохталаштиришга уринаётгани акс этган видео пайдо бўлган эди.
Шундан сўнг Бош прокуратура мазкур ҳолатни текширишни бошлаган эди. Ўрганиш натижасига кўра, 105-участка сайлов комиссиясининг 22 декабрдаги сайлов натижалари бўйича қабул қилган қарорлари бекор қилинди ва ҳақиқий эмас деб топилди.
Бош прокуратура томонидан маълум қилинишича, 2019 йил 22 декабрь куни Бектемир туманидаги 105-сонли сайлов участкаси комиссия аъзолари сайлов вақтида кузатувчиларнинг хонадан чиқиб кетганлигидан фойдаланиб, сайлов қутисига бир нечта сайлов бюллетенларини ташлаган.
Шунингдек, комиссия аъзолари овозларни санаб чиқиш натижалари тўғрисидаги баённомада комиссия аъзоси ҳисобланган Р.Маҳкамовнинг имзосини сохталаштириб, Ўзбекистон Республикасининг сайлов тўғрисидаги қонун ҳужжатларини бузган.
Мазкур ҳолат юзасидан Бош прокуратура томонидан Жиноят кодексининг 146-моддаси (сайлов ёки референдум ташкил қилиш, уларни ўтказиш тўғрисидаги қонун ҳужжатларини бузиш) билан жиноят иши қўзғатилиб, дастлабки тергов ҳаракатлари олиб борилмоқда.
Бектемир тумани сайлов комиссияси томонидан 18-Висол сайлов округида 2020 йил 19 январь куни такрорий сайлов ўтказиш тўғрисида қарор қабул қилинди. Шунингдек, туман сайлов комиссияси томонидан 105-участка сайлов комиссиясининг таркибини алмаштириш ишлари ҳам амалга оширилади.
Изоҳ (0)