Kamerun Respublikasining to‘rt nafar fuqarosi O‘zbekistonga go‘yoki investor sifatida tashrif buyurib, firibgarlik yo‘li bilan O‘zbekiston fuqarolaridan 340 ming dollar miqdoridagi mablag‘ni o‘zlashtirgan. Mazkur holat yuzasidan dastlabki tergov harakatlari yakunlandi. Bu haqda Ichki ishlar vazirligi huzuridagi Tergov departamenti xabar berdi.
Ma’lum qilinishicha, bu fuqarolar Kamerun davlatidan turib jinoiy maqsadlarini amalga oshirish uchun O‘zbekistonda yashovchi bir nechta fuqaro bilan internet orqali muloqotga kirishgan hamda o‘zlarini investor sifatida tanishtirgan. Shu orqali ular o‘zaro hamkorlik taklif qilib, imkoniyati yetarli bo‘lgan o‘zbekistonliklarni sarmoya kirituvchilar sifatida tanlab olgan. Kamerunliklar o‘zlarini ham ana shu soha vakili sifatida tanishtirgan.
Mavzuga doir: O‘zbekistonda 4 nafar Kamerun fuqarosi firibgarlik jinoyati yuzasidan tergov qilinmoqda
O‘zbekistonliklar ularning bu gaplariga ishonib, o‘z pullarini ana shu pullardan olish evaziga kamerunliklarga topshirgan. Shu tariqa, kamerunlik shaxslar O‘zbekiston fuqarolaridan jami 340 ming dollar pulni o‘zlashtirib olgan.
Mazkur holat yuzasidan IIV huzuridagi Tergov departamenti tomonidan jinoyat ishi qo‘zg‘atilib, dastlabki tergov harakatlari olib borildi. Ma’lum bo‘lishicha, kamerunlik mazkur fuqarolar firibgarlik jinoyatidan tashqari, ko‘p miqdordagi qalbaki pullarni o‘tkazish bilan ham shug‘ullangan.
Shunga ko‘ra, Kamerun fuqarolari Ippolit Aristit, Beakup Patrik va Sinduya Fabianga nisbatan Jinoyat kodeksining 168-moddasi 4-qismi “a” bandi (firibgarlik) va 176-moddasi 3-qismi “a” bandi (qalbaki pul, aksiz markasi yoki qimmatli qog‘ozlar yasash, ularni o‘tkazish), Rodrige Vilfredga nisbatan 168-moddasi 3-qismi “a” va “b” bandlari va Jon Fonbega nisbatan 168-moddasi 4-qismi “a” bandi bilan ayblov e’lon qilinib, ularning barchasiga qamoqqa olish tarzidagi ehtiyot chorasi qo‘llanilgan.
Hozirda holat bo‘yicha ayblov xulosasi tuzilib, Bosh prokuraturaga yuborilgan.
Avvalroq nukuslik fuqaro internetda aldanib 165 million so‘m pulini Nigeriyadagi hisob raqamlarga o‘tkazib yuborgani haqida xabar berilgan edi.
Izoh (0)