Bosh prokuror Nig‘matilla Yo‘ldoshev Korrupsiyaga qarshi kurashish bo‘yicha Respublika idoralararo komissiyasining 25-dekabr, chorshanba kuni bo‘lib o‘tgan kengaytirilgan yig‘ilishidagi ma’ruzasida dori-darmon uchun ajratilgan davlat mablag‘larini talon-toroj qilish holatlari ko‘payib borayotganini tanqid qildi.
Misol uchun, “O‘zmedimpeks” mansabdor shaxslari so‘nggi ikki yilda xorijdan “Ampitsilin”, “Sefazolin”, “Seftriakson” va shu kabi boshqa dori vositalarini bir necha barobar qimmat narxda sotib olib, 9,3 million dollar va 4 milliard so‘m budjet mablag‘larini o‘zlashtirgan.Qoraqalpog‘iston Sog‘liqni saqlash vazirligi mansabdor shaxslari 1,8 milliard so‘mlik dori vositalarini qimmat narxda xarid qilib, budjet mablag‘larini talon-toroj qilinishiga yo‘l qo‘ygan. Mazkur holatlar yuzasidan jinoyat ishi qo‘zg‘atilib, tergov o‘tkazilmoqda.
Talon-torojlik va suiiste’molchilik holatlarining asl sabablaridan biri — tizimda dori vositalariga ehtiyojni shakllantirish bo‘yicha mavjud tartibga umuman amal qilinmasligi hamda vazirlik mutasaddilarining bundan manfaatdor emasligidadir.
Xususan, tibbiyot muassasalariga 2019-yilda “O‘zmedimpeks” korxonasi tomonidan 40 milliard so‘mlik, ehtiyoj bo‘lmagan va yaroqlilik muddati shu yilda tugaydigan 719 ming dona dorilar yetkazib berilgan. O‘z navbatida, tibbiyot muassasalari ham bularni vazirlik ta’siri ostida so‘zsiz qabul qilishgan.
Jumladan, Surxondaryoda 3 milliard, Xorazmda 3,2 milliard, Farg‘onada 3,2 milliard, Qoraqalpog‘istonda 3,3 milliard, Qashqadaryoda 3,4 milliard, Samarqandda 3,6 milliard, Toshkent shahrida 8,3 milliard so‘mlik ana shunday dori vositalari qabul qilingan.
Misol uchun, tibbiyot muassasalariga yaroqlilik muddati 2019-yilning 1-sentabrida tugaydigan 107 956 ta “Beksitrol-F” aerozoli yetkazib berilgan. O‘rganishda, bu doriga yillik haqiqiy ehtiyoj 430 tani tashkil etsa-da, e’tibor bering, 7 milliard so‘mlik 107 526 ta yoki ehtiyojga nisbatan 250 baravar ortiqcha yetkazib berilgani aniqlandi.
Yoki tibbiyot muassasalariga umumiy qiymati 971 million so‘mlik 6 089 qadoq “Yanumet” dorisi 2019-yilning yanvar oyida yetkazib berilgan. Vaholanki, uning yaroqlilik muddati shu yil 31-martda tugashi aniqlangan. Bu kabi misollarni yana davom ettirish mumkin.
Mazkur holatlarga Sog‘liqni saqlash vazirligi va “O‘zmedimpeks” korxonasi mansabdor shaxslariga nisbatan qo‘zg‘atilgan jinoyat ishi tergovi davomida, albatta, baho beriladi.
Lekin masalaning eng tashvishli jihati — ayrim turdagi og‘ir kasalliklar uchun zarur dori-darmonlarni yetkazib berish muammo bo‘lib turgan bir paytda, befarq rahbarlarning bunday harakatlari budjet mablag‘larining behuda sarflanishiga sabab bo‘lmoqda.
Nig‘matilla Yo‘ldoshev, bosh prokuror
Izoh (0)