Toshkentdagi respublika tibbiyot markazlarda bir stavkada bir necha shifokor ishlamoqda, joylarda esa oddiy hamshira ham yetishmaydi

O‘zbekistonda 2019-yil 1-fevraldan boshlab Sog‘liqni saqlash vazirligi tizimida tibbiyot xodimlari faqat to‘liq stavkada ishga qabul qilinishi belgilangan, biroq mazkur talab bajarilmayapti.

Bu haqda Korrupsiyaga qarshi kurashish bo‘yicha Respublika idoralararo komissiyasining 25-dekabr kuni bo‘lib o‘tgan kengaytirilgan yig‘ilishida bosh prokuror Nig‘matilla Yo‘ldoshev aytib o‘tdi.

Tibbiyot xodimlarini faqat to‘liq stavkada ishga qabul qilish to‘g‘risidagi sog‘liqni saqlash vazirining 2019-yil 21-yanvardagi buyrug‘idan so‘ng, 68 ta muassasada o‘rganish ishlari olib borilgan.

Ma’lum bo‘lishicha, qariyb 2 ming nafar xodim chorak, 3 800 nafari esa yarim stavkada ishlamoqda. Birgina Respublika ixtisoslashtirilgan akusherlik va ginekologiya ilmiy-amaliy markazida 92 ta shtat birligida 152 shifokor va 162 ta shtat birligida 219 hamshira ishlayapti.

Sog‘liqni saqlash vazirligi ma’lumotiga ko‘ra, bugungi kunda O‘zbekistonda tibbiyot sohasida jami 12 916 nafar (shundan 2 894 nafar umumiy amaliyot va 10 022 nafar tor doiradagi) mutaxassis yetishmaydi.

“Tibbiyot kollejlarini bitirib, ishsiz yurgan yoshlar soni juda yuqori. Shunday bo‘lsa-da, O‘zbekiston bo‘yicha 4,5 mingta o‘rta va kichik tibbiyot xodimlari shtat birliklari to‘ldirilmagan.

Xususan, Surxondaryoda hamshira va kichik tibbiyot xodimi bo‘sh ish o‘rinlari soni 206 ta, Samarqandda 477 ta, Toshkent viloyatida 582 ta, Toshkent shahrida esa 2 213 taligicha qolmoqda”, — deya bosh prokurorning so‘zlaridan iqtibos keltirmoqda “Daryo” muxbiri.