Бош прокурор Ниғматилла Йўлдошев Коррупцияга қарши курашиш бўйича Республика идоралараро комиссиясининг 25 декабрь, чоршанба куни бўлиб ўтган кенгайтирилган йиғилишидаги маърузасида дори-дармон учун ажратилган давлат маблағларини талон-торож қилиш ҳолатлари кўпайиб бораётганини танқид қилди.
Мисол учун, «Ўзмедимпекс» мансабдор шахслари сўнгги икки йилда хориждан «Ампицилин», «Цефазолин», «Цефтриаксон» ва шу каби бошқа дори воситаларини бир неча баробар қиммат нархда сотиб олиб, 9,3 миллион доллар ва 4 миллиард сўм бюджет маблағларини ўзлаштирган.Қорақалпоғистон Соғлиқни сақлаш вазирлиги мансабдор шахслари 1,8 миллиард сўмлик дори воситаларини қиммат нархда харид қилиб, бюджет маблағларини талон-торож қилинишига йўл қўйган. Мазкур ҳолатлар юзасидан жиноят иши қўзғатилиб, тергов ўтказилмоқда.
Талон-торожлик ва суиистеъмолчилик ҳолатларининг асл сабабларидан бири — тизимда дори воситаларига эҳтиёжни шакллантириш бўйича мавжуд тартибга умуман амал қилинмаслиги ҳамда вазирлик мутасаддиларининг бундан манфаатдор эмаслигидадир.
Хусусан, тиббиёт муассасаларига 2019 йилда «Ўзмедимпекс» корхонаси томонидан 40 миллиард сўмлик, эҳтиёж бўлмаган ва яроқлилик муддати шу йилда тугайдиган 719 минг дона дорилар етказиб берилган. Ўз навбатида, тиббиёт муассасалари ҳам буларни вазирлик таъсири остида сўзсиз қабул қилишган.
Жумладан, Сурхондарёда 3 миллиард, Хоразмда 3,2 миллиард, Фарғонада 3,2 миллиард, Қорақалпоғистонда 3,3 миллиард, Қашқадарёда 3,4 миллиард, Самарқандда 3,6 миллиард, Тошкент шаҳрида 8,3 миллиард сўмлик ана шундай дори воситалари қабул қилинган.
Мисол учун, тиббиёт муассасаларига яроқлилик муддати 2019 йилнинг 1 сентябрида тугайдиган 107 956 та «Бекситрол-Ф» аэрозоли етказиб берилган. Ўрганишда, бу дорига йиллик ҳақиқий эҳтиёж 430 тани ташкил этса-да, эътибор беринг, 7 миллиард сўмлик 107 526 та ёки эҳтиёжга нисбатан 250 баравар ортиқча етказиб берилгани аниқланди.
Ёки тиббиёт муассасаларига умумий қиймати 971 миллион сўмлик 6 089 қадоқ «Янумет» дориси 2019 йилнинг январь ойида етказиб берилган. Ваҳоланки, унинг яроқлилик муддати шу йил 31 мартда тугаши аниқланган. Бу каби мисолларни яна давом эттириш мумкин.
Мазкур ҳолатларга Соғлиқни сақлаш вазирлиги ва «Ўзмедимпекс» корхонаси мансабдор шахсларига нисбатан қўзғатилган жиноят иши тергови давомида, албатта, баҳо берилади.
Лекин масаланинг энг ташвишли жиҳати — айрим турдаги оғир касалликлар учун зарур дори-дармонларни етказиб бериш муаммо бўлиб турган бир пайтда, бефарқ раҳбарларнинг бундай ҳаракатлари бюджет маблағларининг беҳуда сарфланишига сабаб бўлмоқда.
Ниғматилла Йўлдошев, бош прокурор
Изоҳ (0)