ЙПХ ходимлари 2020 йил 1 январдан бошлаб мобил видеокамера (бодикамера)дан фойдаланган ҳолда ўз хизмат вазифасини олиб боради. Бу ҳақда 24 декабрь куни Ахборот ва оммавий коммуникациялар агентлигида ўтказилган брифингда маълум қилинди, дея хабар бермоқда «Дарё» мухбири Миролим Исажонов.
Матбуот анжуманида таъкидланишича, Хитойнинг «Хайтера» компаниясидан 6 193 та бодикамералар харид қилинган. Шундан 200 донаси Қорақалпоғистон Республикасига, Тошкент шаҳрига 2 876 донаси, Андижон вилоятига 187 донаси, Бухоро вилоятига 212 донаси, Жиззах вилоятига 188 донаси, Қашқадарё вилоятига 236 донаси, Навоий вилоятига 185 донаси, Наманган вилоятига 184 донаси, Самарқанд вилоятига 341 донаси, Сурхондарё вилоятига 203 донаси, Сирдарё вилоятига 183 донаси, Тошкент вилоятига 432 донаси, Фарғона вилоятига 289 донаси, Хоразм вилоятига 191 дона ажратилиб, 193 донаси захирага олинди.
Бодикамералар учун техник топшириқ ва дастурий таъминот ишлаб чиқилиб, тасдиқланган. Техник топшириқ талабларига жавоб берганлари сентябрь—октябрь ойларида Тошкент шаҳрида тест синовларидан ўтказилди ва натижалар ижобий баҳоланди.
Бодикамералар онлайн режимда ишлаб, ходим ва фуқаро ўртасидаги барча ҳолатни борича ёзиб олади. У эрталаб ёқилади, ходимнинг хизмат вақти тугагач эса ўчади. ИИБ вакили ошхонага кирса ҳам, ўтирса ҳам қурилмани ўчиролмайди. Агар ходим камерани ечса ёки унинг олдини тўсиб қўйса, ўша заҳоти серверга бу ҳақда хабар етиб боради.Қайд этилишича, ЙПХ инспекторларидан ташқари, биринчи навбатда, Тошкент шаҳар ИИББ ППХ бригадаси, кейинроқ эса бошқа ҳудудларнинг патрул-пост ходимлари бодикамералар билан таъминланади.Камеранинг битта батареясидаги қувват 8 соатга етади. 24 соат мобайнида захирадаги батареялар ҳам камера самарали ишлашида асқотади. Камера 25—30 метр масофагача бўлган ҳолатни ёзиб олади ва у бир ой сақланади. Бодикамеранинг бир донаси 400 доллар нархда харид қилинди.
Мамлакат бўйича сервер мосламаларини жойлаштириш учун 65 та, бодикамераларни жойлаштиришга 192 та жой тайёрланди. Битта сервер 50 тадан 100 тагача камерани қамраб олади. Уларни алоҳида диспетчерлар мунтазам назорат қилиб боради. Бодикамераларга тегишли дастурлар ўрнатилиб, керакли миқдорда SIM-карталар билан таъминланди ва ҳимояланган VPN- каналлари орқали алоқа йўлга қўйилди.
Бодикамералар Марказий Осиё мамлакатлари орасида илк бор Ўзбекистонда жорий қилинмоқда. Биз мазкур қурилманинг ишлаб чиқарилиши, нархи ва техник хусусиятларини ўрганиш мақсадида Хитой, Германия, АҚШ каби давлатларда бўлдик. Мақсад — соҳамизда инсон омилини камайтириш, аҳоли ва ходимларимизни тартибга чақириш, турли кўнгилсиз ҳолатларнинг олдини олишдир.
Азизбек Икромов, ички ишлар вазири ўринбосари
Ўзбекистонда ички ишлар органлари ходимлари боди-камералар билан ишлай бошлаши ҳақида илк бор 2017 йил 22 декабрида айтилган, муддат сифатида 2018 йилнинг 10 феврали кўрсатилган эди. Кейинчалик муддат 1 мартга кўчди, кейинроқ сентябрда бўлади, дейилди. 2018 йил декабрида ҳукумат томонидан қабул қилинган қарорда янги муддат — 2019 йил 1 июли кўрсатилди.
2019 йил 3 июлида эса ҳукумат боди-камералар бўйича янги қарор қабул қилди. Унга кўра, ички ишлар органлари ходимларининг боди-камерадан фойдаланган ҳолда ишлашга ўтиш муддати 2020 йил 1 январгача кечиктирилди. Бунга Мудофаа саноати давлат қўмитаси ва ИИВ раҳбарияти томонидан йўл қўйилган ортиқча сансоларлик ва бюрократизм сабаб бўлган.
Изоҳ (0)