Vazirlar Mahkamasining rieltorlik faoliyatini litsenziyalash to‘g‘risidagi ma’muriy reglamentni tasdiqlash haqidagi qarori loyihasi muhokama uchun joylashtirildi.
Belgilanishicha, rieltorlik faoliyatini amalga oshirish uchun litsenziyalar olish haqidagi arizalar faqat Davlat xizmatlari markazlari yoki O‘zbekiston Respublikasining Yagona interaktiv davlat xizmatlari portali orqali qabul qilinadi.
Rieltorlik faoliyatini litsenziyalash bo‘yicha davlat xizmati ko‘rsatishning ma’muriy reglamenti tasdiqlanadi.
Davlat xizmati Davlat xizmatlari markazlari yoki Yagona interaktiv davlat xizmatlari portali orqali Davlat aktivlarini boshqarish agentligining Qoraqalpog‘iston Respublikasi, viloyatlar va Toshkent shahar hududiy boshqarmalari tomonidan amalga oshiriladi.
Rieltorlik faoliyatini amalga oshirish huquqini beruvchi litsenziya cheklanmagan muddatga beriladi.
Rieltorlik faoliyatini amalga oshiruvchi yuridik shaxslar ko‘rsatilayotgan xizmatlar qiymatining kamida 15 foizi miqdorida haqini oldindan to‘lamasdan rieltorlik xizmatlari ko‘rsatishga haqli.
Rieltorlik faoliyati quyidagi rieltorlik xizmatlari turlarini ko‘rsatish yo‘li bilan amalga oshiriladi:
- ko‘chmas mulk obyektlariga va ularga bo‘lgan huquqlarga doir bitimlar tuzish chog‘ida vositachilik qilish;
- ko‘chmas mulk obyektlarining va ularga bo‘lgan huquqlarning savdosini tashkil etish;
- ko‘chmas mulk obyektlarini ishonchli boshqarish.
- Jismoniy va yuridik shaxslar tomonidan ko‘chmas mulk bozorida axborot va maslahat xizmatlarini amalga oshirish uchun litsenziya olish talab etilmaydi.
Quyidagilar rieltorlik faoliyatini amalga oshirishdagi litsenziya talablari va shartlari hisoblanadi:
a) litsenziya tomonidan rieltorlik faoliyatini amalga oshirish sohasidagi qonun hujjatlariga rioya qilish;
b) rieltorlik tashkilotining rieltorlik xizmatlari buyurtmachisi oldidagi rieltorlik tashkilotlari ushbu Reglamentda belgilangan hajmdan kam bo‘lmagan miqdordagi fuqarolik majburiy sug‘urta polisining mavjud bo‘lishi;
v) har uch yilda xodimlarining malakasini oshirishni ta’minlash;
g) rieltorlik xizmatlari ko‘rsatishda olingan axborotlarning maxfiyligini ta’minlash;
d) har yarim yilda bir marta O‘zbekiston Respublikasi Davlat aktivlarini boshqarish agentligiga rieltorlik faoliyati to‘g‘risidagi ma’lumotlarni belgilangan shakl bo‘yicha taqdim etish;
ye) rieltorlik tashkiloti rahbari lavozimiga faqat rieltorning malaka sertifikatiga ega bo‘lgan xodimni tayinlash;
yo) rieltorlik tashkiloti shtatida rieltorning malaka sertifikatiga ega bo‘lgan kamida ikki nafar xodimning bo‘lishi.
Ushbu bandning “b”, “v”, “ye” va “yo” kichik bandlari talablari rieltorlik faoliyatini amalga oshirishda rieltorga (jismoniy shaxsga) tatbiq etilmaydi.
Quyidagilar:
- ko‘chmas mulk obyektlariga va ularga bo‘lgan huquqlarga doir bitimlar tuzish chog‘ida vositachilik qiladigan rieltorlik tashkilotlari — bazaviy hisoblash miqdorining 500 baravariga teng miqdorda o‘zining fuqarolik majburiyati majburiy sug‘urta qilingan bo‘lishi;
- ko‘chmas mulk obyektlarini ishonchli boshqarishni amalga oshiradigan rieltorlik tashkilotlari — bazaviy hisoblash miqdorining 1000 baravariga teng miqdorda o‘zining fuqarolik majburiyati majburiy sug‘urta qilingan bo‘lishi;
- ko‘chmas mulk obyektlari va ularga bo‘lgan huquqlar savdosini tashkil etadigan rieltorlik tashkilotlari — bazaviy hisoblash miqdorining 3000 baravariga teng miqdorda o‘zining fuqarolik majburiyati majburiy sug‘urta qilingan bo‘lishi lozim.
Izoh (0)