Avvalroq Toshkent shahar hokimligi Yashnobod tumanidagi saylov uchastkalarida “chernovik” protokollardan foydalanishi holatlari sodir bo‘lgani haqida xabar berilgandi. “Chernovik” protokollarga oid yozishmalarning skrinshotlari saylov kuni davomida @saylov_2019bot Telegram-boti orqali saylovdagi qoidabuzarliklar haqidagi ma’lumotlarni to‘plab borgan huquqshunos va bloger Xushnud Xudoyberdiyev tomonidan e’lon qilingan edi. MSK vakillari, huquq-tartibot organlari xodimlari, “Daryo”, “Gazeta.uz”, “Kun.uz” va boshqa nashrlar jurnalistlari, blogerlar va Xushnud Xudoyberdiyevning o‘zi yarim tun bo‘lishiga qaramasdan Yashnobod tumaniga yo‘l olib, vaziyatni o‘rgandi.
Skrinshotlarda Qudrat Husanov nomidan qoldirilgan yozuvlarni ko‘rish mumkin, unda Husanov ovoz berish jarayoni yakuniga yetishi bilan saylov uchastkalaridagi protokollarning “chernovik” variantlarini zudlik bilan olib kelish haqida topshiriq bergan. “Chernovikdan kopiya ham berilmasinmi?”, degan savolga, u: “Yo‘q, opa, umuman”, deb javob bergan. Yozishmalarda: “Hech kim protokolni rasmga oldirmasin”, degan yozuv ham bor.
Xullas ko‘pchilik bo‘lib saylov okrugiga bordik.Voqea qahramoni, 27 yoshli Qudrat Xusanov bilan ham suhbatlashdik. Vaziyatni tushuntirishga harakat qildi. Qolganini videoda batafsil bayon qilganman.
Albatta, umuman olganda biroz ko‘ngilsiz ish bo‘ldi. Ammo voqealar rivojida meni bir narsa xursand qildi.
OAV vakillari tuman saylov okrugiga borishganida yarim tun bo‘lsa ham, kazo-kazo mutasaddilar allaqachon yetib kelishgandi. Va ular jurnalistlarga o‘ta hurmat bilan munosabatda bo‘lishdi. Barcha sharoitni yaratib berishdi. “Yana xizmatlar bormi?” deb so‘rashdi oxirida.
Bunaqa vaziyatda odatda “qaysi biring yozding?”, “nega bunaqa ig‘vo yozasan?”, “siyosatimizga qarshimisan?”, “aqlingni kiritib qo‘yish kerak ekan” degan munosabatga o‘rganib qolgandik.
Hech bir jamiyat xatodan holi emas, ammo eng yaxshi jamiyat xatolarni tan oladi, to‘g‘ri munosabatda bo‘ladi va keng jamoatchilik oldida hisobdorlikni his qiladi. Mana shunisi o‘ta muhim!
Tezkor munosabat va hamkorlik uchun Markaziy saylov komissiyasi hamda Bosh prokuraturaga minnatdorlik bildiraman.
Xushnud Xudoyberdiyev, bloger
Izoh (0)