Toshkentda 22-dekabr kuni bo‘lib o‘tgan brifingda saylovlardagi qonunbuzilish holatlari yuzasidan Markaziy saylov komissiyasiga tushayotgan murojaatlar haqida ma’lumot berilgan edi.
“Kun.uz”ning xabar berishicha, MSK Kotibiyat mudiri Xudoyor Mamatov Chirchiq shahridagi 197- va 198-saylov uchastkalarida Chirchiq shahar kengashiga nomzod Dastirov Sardor Ravshan o‘g‘li tashviqot tadbirlarini olib borayotgani haqida murojaat bo‘lgani, murojaat zudlik bilan nazoratga olinib prokuratura organlariga yuborilganini bildirgan.
Bosh prokuratura axborotiga ko‘ra, mazkur holat Chirchiq shahar prokuraturasi tomonidan o‘rganib chiqilgan.
Aniqlanishicha, Sardor Dastirovning nomzodi Chirchiq shahar kengashiga “Adolat” sotsial demokratik partiyasidan 3-sonli saylov okrugi 183-sonli saylov uchastkasidan ko‘rsatilgan bo‘lib, 197 va 198-sonli saylov uchastkalaridan nomzodi qo‘yilmagan.
Sardor Dastirov o‘z tushuntirishida 22-dekabr kuni Chirchiq shahridagi saylov uchastkalarida tashviqot ishlarini olib bormaganini, kun davomida 2-sonli oilaviy poliklinika binosida tashkil etilgan “Adolat” SDP shahar kengashining kichik shtabida bo‘lganligini bayon qilgan.
Buni “Adolat” SDPdan nomzod O‘ktam Tojiboyev ham tasdiqlagan. Qolaversa, yana 9 nafar fuqaro yuqoridagi kabi tushuntirish berishgan.
Bundan tashqari, 197- va 198-sonli saylov uchastkalari raislari va a’zolari ham shunday mazmundagi ma’lumotnoma taqdim etishgan.
Shu tariqa, prokuratura surishtiruvida Markaziy saylov komissiyasiga kelib tushgan ma’lumot o‘z tasdig‘ini topmagan.
Izoh (0)