O‘zbekistondagi korxona-tashkilotlarning 65 foizi xizmatlar sohasida faoliyat ko‘rsatayotgani ma’lum bo‘ldi

Joriy yil 1-dekabr holatiga O‘zbekistonda faoliyat ko‘rsatayotgan jami korxona va tashkilotlar soni 395,9 ming birlikka yetdi. Bu haqda Davlat statistika qo‘mitasi xabar berdi.

Jumladan, xizmatlar sohasida jami 260,2 ming birlik korxona va tashkilot faoliyat ko‘rsatmoqda. 2018-yilning shu davriga nisbatan ularning o‘sishi 22,7 foizga yetdi.

2019-yil 1-dekabr holatiga xizmatlar sohasida faoliyat ko‘rsatayotgan korxona va tashkilotlarning ulushi 65,8 foizni tashkil yetdi.

Taqqoslash uchun: kuzatilayotgan davrda sanoat sohasida faoliyat ko‘rsatayotgan korxona va tashkilotlarning ulushi 17,8 foiz, qurilish 9,1 foizga yetdi va atigi 7,3 foiz qishloq, o‘rmon va baliq xo‘jaligi sohasi hissasiga to‘g‘ri keldi.

Xizmatlar sohasida faoliyat ko‘rsatayotgan korxona va tashkilotlar tarkibida savdo faoliyati bilan shug‘ullanuvchi korxona va tashkilotlar (38,3 foiz) yuqori ulushni egallaydi.Istiqomat qilish va ovqatlanish bo‘yicha xizmat ko‘rsatuvchi korxona-tashkilotlar 9,8 foizni tashkil etdi.

Tashish va saqlash faoliyati bilan shug‘ullanuvchi hamda xizmatlar sohasidagi tegishli faoliyat ko‘rsatayotgan korxona va tashkilotlar ulushi ularning umumiy sonida 5,9 foizga yetdi.

Axborot faoliyati bilan shug‘ullanuvchi va aloqa xizmatlarini ko‘rsatuvchi korxona-tashkilotlarning ulushi 3,0 foizga teng bo‘ldi.

Sog‘liqni saqlash, shuningdek, ijtimoiy xizmatlar sohasida faoliyat ko‘rsatayotgan korxona-tashkilotlarning ulushi ham 3,0 foizni tashkil etdi.