Buxoro shahrining Mahtumquli ko‘chasidagi uyda sodir bo‘lgan yong‘in oqibatida uy egasining 5 yoshli qiz nabirasini kuygan holdagi jasadi topildi. Bu haqda Davlat yong‘in xavfsizligi xizmati xabar berdi.
Ma’lumotlarga ko‘ra 23-dekabr kuni soat 00:48 daqiqa o‘tganda ushbu uyda yong‘in bo‘layotganligi haqida yong‘in-qutqaruv qismiga xabar kelib tushgan.
Voqea joyiga 2 ta yong‘in o‘chirish bo‘linmalari jalb etilgan. Bo‘linmalar chaqirilgan manzilga 9 daqiqada yetib borgan. Ko‘rilgan tezkor harakatlar natijasida yong‘in soat 01:05 da qurshab olingan va soat 02:15 da to‘liq bartaraf etilgan. Yong‘in oqibatida yashash uyining 45 kvadrat metr maydonda tomi, shifti va ichki jihozlari yonib zararlangan. Saqlab qolingan maydoni 150 kvadrat metr.
“Achinarlisi, yong‘inni o‘chirish vaqtida uy egasining 2014-yilda tug‘ilgan qiz nabirasini kuygan holdagi jasadi topilgan”, — deyiladi xabarda.
Hozirda yong‘inning kelib chiqish sababi isitish qozoni dudbo‘ronining noto‘g‘ri o‘rnatilishi ekanligi taxmin qilinmoqda. Holat yuzasidan tergovga qadar tekshiruv ishlari olib borilmoqda.
Izoh (0)