Chet eldagi saylov okruglari O‘zbekistonning ma’lum bir hududlariga biriktirilgan. Masalan, Xitoydagi O‘zbekiston fuqarolari faqat Toshkent shahridan ko‘rsatilgan nomzodlargagina ovoz bera oladi. Lekin Xitoyda nafaqat Toshkent shahridan, balki O‘zbekistonning boshqa hududlaridan borgan fuqarolar ham bor.
“Daryo” muxbiri Musulmonbek Ibrohimov 22-dekabr kuni Markaziy saylov komissiyasining Xalqaro matbuot markazida bo‘lib o‘tgan brifingda: “Ushbu saylov uchastkalari nima asosda tashkil etilgan?”, degan savol bilan tashqi ishlar vaziri birinchi o‘rinbosari Ilhom Ne’matovga murojaat qildi. Ne’matov ham xuddi shu savolni saylov jarayonlari boshlanganidan buyon o‘ziga berayotganini tan oldi.
Bu savolni nafaqat o‘zimga, balki saylovni tashkil etish bilan shug‘ullanayotgan Markaziy saylov komissiyasi rasmiylarga ham berib kelyapman. Darhaqiqat, chet elda mehnat qilayotgan hamyurtlarimizning aksariyati viloyatlardan.Muammolar ko‘p, bu kabi kamchiliklar albatta hal etiladi. To‘g‘risini tan olib aytish kerak, chet eldagi saylov uchastkalarining bu yo‘sinda tashkil etilgani noto‘g‘riroq bo‘lgan. Shuning uchun ham bu masala keyinchalik ko‘rib chiqiladi.
Ta’kidlash joiz, chet eldagi fuqarolarimizning saylov huquqi birinchi marta to‘laqonli ta’minlandi. Avval bunday bo‘lmagan. Men 2009-yili Rossiyada elchi bo‘lganman. O‘shanda elchixonaning o‘zidagina saylov uchastkasi tashkil etilgan, xolos.
Hozir esa Rossiyaning o‘zidagi sakkizta saylov uchastkasidan tashqari yana 90 ta hududga saylov qutilari samolyot, vertolyot va poyezdlar vositasida yetkazilib, ovoz berish ta’minlandi. Bu — yangilik. Lekin saylov jarayonlari 100 foiz ideal tashkil qilindi, deb aytolmayman.
Ilhom Ne’matov, tashqi ishlar vaziri birinchi o‘rinbosari
Izoh (0)