Oliy Majlis Qonunchilik palatasi va mahalliy kengashlar deputatlari saylovida 13:00 holatiga ko‘ra 7 million 971 ming 252 saylovchi yoki jami saylovchilarning 42,4 foizi ovoz berib bo‘ldi. Bu haqda Markaziy saylov komissiyasi kotibi Xudoyor Mamatov ma’lum qildi. 15:00 holatiga ko‘ra, 18,7 milliondan ziyod saylovchilarning 58,3 foizi yoki 10,9 milliondan ortig‘i ovoz berib bo‘lgan.
“Bu — joriy saylovlarni bo‘lib o‘tgan deb hisoblash mumkin, degani va men, fursatdan foydalanib, syalov jarayoni ishtirokchilarini, xalqimizni ushbu voqea bilan tabriklayman”, — dedi u.
Saylov kodeksiga muvofiq, agar saylovda saylovchilar ro‘yxatiga kiritilgan saylovchilarning 33 foizidan kami ishtirok etgan bo‘lsa, o‘tmagan deb topiladi.
Xudoyor Mamatov ayrim saylov uchastkalarida qoidabuzarliklarga yo‘l qo‘yilayotgani, xususan, ayrim fuqarolar boshqa oila a’zolari nomidan ovoz bergani holatlari haqida xabarlar borligini ta’kidlab o‘tdi.
Avvalroq ichki ishlar vaziri Po‘lat Bobojonov Farg‘ona viloyatining Quva tumanida noqonuniy tashqivot holati qayd etilganini ma’lum qilgan edi — deputatlikka nomzodlardan birining qarindoshi nomzodning surati tushirilgan fotosuratni mashinasiga yopishtirib olgan. Bu haqdagi axborot prokuraturaga berilgan. “Gazeta.uz”ning yozishicha, shu kabi shikoyat xalq deputatlari Chirchiq shahar kengashiga ko‘rsatilgan nomzod ustidan ham tushgan.
Izoh (0)