Чет элдаги сайлов округлари Ўзбекистоннинг маълум бир ҳудудларига бириктирилган. Масалан, Хитойдаги Ўзбекистон фуқаролари фақат Тошкент шаҳридан кўрсатилган номзодларгагина овоз бера олади. Лекин Хитойда нафақат Тошкент шаҳридан, балки Ўзбекистоннинг бошқа ҳудудларидан борган фуқаролар ҳам бор.
«Дарё» мухбири Мусулмонбек Иброҳимов 22 декабрь куни Марказий сайлов комиссиясининг Халқаро матбуот марказида бўлиб ўтган брифингда: «Ушбу сайлов участкалари нима асосда ташкил этилган?», деган савол билан ташқи ишлар вазири биринчи ўринбосари Илҳом Неъматовга мурожаат қилди. Неъматов ҳам худди шу саволни сайлов жараёнлари бошланганидан буён ўзига бераётганини тан олди.
Бу саволни нафақат ўзимга, балки сайловни ташкил этиш билан шуғулланаётган Марказий сайлов комиссияси расмийларга ҳам бериб келяпман. Дарҳақиқат, чет элда меҳнат қилаётган ҳамюртларимизнинг аксарияти вилоятлардан.Муаммолар кўп, бу каби камчиликлар албатта ҳал этилади. Тўғрисини тан олиб айтиш керак, чет элдаги сайлов участкаларининг бу йўсинда ташкил этилгани нотўғрироқ бўлган. Шунинг учун ҳам бу масала кейинчалик кўриб чиқилади.
Таъкидлаш жоиз, чет элдаги фуқароларимизнинг сайлов ҳуқуқи биринчи марта тўлақонли таъминланди. Аввал бундай бўлмаган. Мен 2009 йили Россияда элчи бўлганман. Ўшанда элчихонанинг ўзидагина сайлов участкаси ташкил этилган, холос.
Ҳозир эса Россиянинг ўзидаги саккизта сайлов участкасидан ташқари яна 90 та ҳудудга сайлов қутилари самолёт, вертолёт ва поездлар воситасида етказилиб, овоз бериш таъминланди. Бу — янгилик. Лекин сайлов жараёнлари 100 фоиз идеал ташкил қилинди, деб айтолмайман.
Илҳом Неъматов, ташқи ишлар вазири биринчи ўринбосари
Изоҳ (0)