“Vladivostokdan tortib Vashingtongacha bo‘lgan joylarda ovoz berishadi”

O‘zbekiston tashqi ishlar vazirining birinchi o‘rinbosari Ilhom Ne’matovning ta’kidlashicha, dunyoning turli nuqtalarida istiqomat qilayotgan O‘zbekiston fuqarolari uchun ham saylov uchastkalari tashkil etildi. Ushbu holat mamlakat tarixida ilk bor kuzatilmoqda.

U bu haqda 22-dekabr kuni Markaziy saylov komissiyasining Xalqaro matbuot markazida bo‘lib o‘tgan brifingda ma’lum qildi, deya xabar berdi “Daryo” muxbiri Musulmonbek Ibrohimov.

“Bugungi saylov mutlaqo yangi siyosiy muhitda o‘tmoqda. Davlatimiz rahbari tomonidan nafaqat O‘zbekistonda, balki ko‘plab davlatlarda ham yashayotgan fuqarolarimizning saylovdagi ishtirokini ta’minlashga juda katta e’tibor qaratildi. 55 ta mamlakatda ochilgan saylov uchastkalarining hammasini Markaziy saylov komissiyasi hamkorligida kerakli barcha narsalarni o‘z vaqtida yetkazib, kamchiliklarsiz ta’minladik.

Yangi qabul qilingan saylov kodeksi asosida, O‘zbekiston tarixida birinchi marta turli sabablarga ko‘ra xorijda yashayotgan vatandoshlarimiz uchun elektron shaklda saylov uchastkasining saylovchilar ro‘yxatiga kirish tizimi yo‘lga qo‘yildi. Shu paytga qadar bu tarzda chet eldagi o‘zbekistonliklarga hech qachon saylov o‘tkazilmagan”, — dedi Ilhom Ne’matov.

“Toshkent vaqti bilan soat 8:00 dan 11:00 gacha bo‘lgan vaqt oralig‘ida 11 ta davlatda 15 ta saylov uchastkalari ochilib, ovoz berish jarayonlari boshlandi.

Soat 12:00 da yana 25 ta davlatda 37 ta saylov uchastkasi ochilgan bo‘lsa, bir soat o‘tib Londondagi elchixonada saylov uchastkasi ish boshladi. Eng so‘nggi saylov uchastkalari Toshkent vaqti bilan soat 18:00 da Vashington va Nyu-Yorkda ochiladi.

Parlament saylovlari Vladivostokda boshlangan bo‘lsa, Amerikada tamom bo‘ladi. Mahalliy vaqt bilan soat 12:00 ga chet eldagi 1455 nafar fuqarolarimiz ovoz berdi”, — dedi Ne’matov.