Saylovoldi kampaniyasi davomida kamida ikki holatda amaldagi saylov qonunchiligi talablari buzilgani aniqlandi. Bu haqda 22-dekabr kuni Markaziy saylov komissiyasining Xalqaro matbuot markazida bo‘lib o‘tgan brifingda ma’lum qilindi, deya xabar bermoqda “Daryo” muxbiri.
Xususan, Olmazor tumanidagi 38-saylov okrugidan nomzod sifatida ko‘rsatilgan Abror Ahmedov saylovoldi tashviqoti shartlari va tartiblarini buzib, aholiga imtiyozli narxda iste’mol mahsulotlarini taklif qilib, evaziga o‘z nomzodiga ovoz berishga chorlagan va buning uchun 18-dekabrda sud qarori bilan jarimaga tortilgan.
Shuningdek, nomzodi Namangan shahridagi 32-Isfahon saylov okrugidan ilgari surilgan Zokir Xo‘jayev saylov kuni unga ovoz berishlari uchun fuqarolarga oziq-ovqat mahsulotlarini bepul tarqatgani tufayli 20-dekabr kungi sud qarori bilan ma’muriy javobgarlikka tortilgan.
Matbuot anjumanida “Daryo” muxbiri Musulmonbek Ibrohimov Bosh prokuratura rahbariyatiga: “Ma’muriy javobgarlikka tortilgan nomzodlar saylov yakunida g‘alaba qozonsa, nima bo‘ladi?”, deya savol bilan murojaat qildi.
Saylov arafasida ma’muriy javobgarlikka tortilgan nomzod saylovda yutib chiqsa, bu unga monelik qilmaydi. U deputatlik faoliyatini davom ettiraveradi. Jinoiy javobgarlikka tortilsa — bu boshqa masala.Hamma ovozlarni sotib bo‘lmaydi. Agar uning saylovchilari “Bizga shu deputat kerak”, aytgan bo‘lsa, u bajonidil keyinchalik deputat bo‘la turib, saylovchilar umidini oqlash kerak.
Lekin siz bilan biz fol ochmay turaylik. Vaziyatni kuzataylik.
Svetlana Ortiqova, bosh prokuror o‘rinbosari
Izoh (0)