Eron mamlakatdagi namoyishlar oqibatida ko‘rilgan zararni AQShga qoplatmoqchi

Eron mamlakatda benzin narxining oshishi oqibatida boshlangan norozilik namoyishlaridan ko‘rilgan 130 milliard dollarlik zararni AQSh qoplab berishini istamoqda. Bu haqda Eron Oliy sudi raisi G‘ulom Husayn Ismoiliy ma’lum qilgan, deb yozmoqda Fars agentligi.

“AQSh hukumatiga nisbatan jami 360 ta jinoiy ish ochilgan va sudda ko‘rib chiqilgan, ular talofat ko‘rgan Eron fuqarolariga jami 130 milliard dollar to‘lab berishi lozim”, — deydi sud hokimiyati vakili.

Shuningdek, u Eron hukumati va tashqi ishlar vazirligidan ushbu mablag‘larning undirilishida amaliy yordam so‘ragan.

17-noyabrda Eron oliy yetakchisi Ali Xamonaiy benzin narxi oshgani tufayli boshlangan noroziliklarni xorij davlatlarining fitnasi deb atagan. Uning so‘zlariga ko‘ra, to‘polonlar va binolarning yondirilishi eronliklar emas, balki xorijdagi kuchlar yollagan bezorilar tomonidan uyushtirilgan.

“Inqilobga qarshi bo‘lgan Eron dushmanlari doimo zo‘ravonlikni qo‘llab-quvvatlagan va bunday qilmishlarni bajarishda davom etmoqda”, — degan Xamonaiy.

Erondagi norozilik namoyishlari 15-noyabrda boshlangan. Noroziliklarga Eron prezidenti Hasan Ruhoniy va parlament spikeri Ali Larjoniy ham kirgan Iqtisodiyotni boshqarish oliy kengashining mamlakatda benzin narxini oshirish haqidagi qarorni imzolagani va yonilg‘i qiymatining 50 foizga qimmatlashgani sabab bo‘lgan.