Eron axborot vazirligi fors tilida Buyuk Britaniyadan turib efirga uzatiluvchi Iran International kanalini mamlakat hududida terrorchilik harakatlariga aloqadorlikda aybladi. Vazirlikning bu haqidagi bayonoti 30-noyabr, shanba kuni tarqatilgan, deb yozmoqda “TASS”.

Foto: Iranianuk

“Axborot vazirligi ushbu kanal va uning xodimlarining Eron dushmanlari bilan hamkorlik qilganligi, terrorchilik harakatlarini amalga oshirishga aloqadorligini ma’lum qiladi”, — deya vazirlik xabarnomasini e’lon qilgan Fars agentligi. Shuningdek, vazirlik mamlakat hududida tashkilot xodimlarining hisob raqamlariga cheklovlar qo‘yishni taklif qilgan.

Vazirlik ma’lumotiga ko‘ra, sun’iy yo‘ldosh orqali translyatsiya qilinuvchi Iran International kanali Saudiya Arabistonining pullari evaziga tashkil qilingan va Buyuk Britaniyada litsenziya olgan. Vazirlik matbuot xizmatiga ko‘ra, OAVning maqsadi Eronda tartibsizliklarni yuzaga keltirish, mamlakatning turli burchaklarida jamoat va shaxsiy mulklarga zarar keltirishdan iborat.

Iran International Eron fuqarolari uchun sun’iy yo‘ldosh orqali teleko‘rsatuvlarni efirga uzatuvchi taniqli kanallardan biri hisoblanadi. 16-noyabrda boshlangan va bir necha kun davom etgan norozilik namoyishlari vaqtida ushbu telekanal Eron hukumatini keskin tanqid qilgan.

Eronda aholining norozilik namoyishlari 16-noyabrda hukumatning benzin narxini oshirish haqidagi qarorni imzolagani oqibatida boshlangan. Eron politsiyasi namoyishchilarni tarqatish uchun ularga nisbatan o‘qotar quroldan foydalangan. Noroziliklar tufayli 16-noyabr kuni Eronda internet o‘chirib qo‘yildi. Vashington Eron hukumatining mamlakatda boshlangan noroziliklar tufayli internetni o‘chirib qo‘yganini keskin qoraladi va namoyishchilar tomonida ekanligini ma’lum qildi. Eron benzin narxi oshgani tufayli moddiy zarar ko‘rgan aholiga ko‘rilgan zararni qoplash uchun subsidiyalar ajratgan. Eron oliy yetakchisi Ali Xomanaiy mamlakatda benzin narxining oshishi sabab boshlangan xalq noroziliklarini xorijdagi dushmanlarning fitnasi deb atagan. Eron prezidenti Hasan Ruhoniy esa ushbu norozilik namoyishlari ortida maqsadi mamlakat xavfsizligiga tahdid qilish bo‘lgan AQSh hamda Isroil turganini taxmin qilgan.

Erondagi norozilik namoyishlari vaqtida politsiya qo‘lga tushirgan bezorilar o‘t qo‘yilgan har bir bino uchun 60 AQSh dollari miqdorida mukofotga ega bo‘lganini tan olgan. AQSh namoyishlar vaqtida internet o‘chirilgani uchun Eron aloqa vaziriga nisbatan sanksiya qo‘llagan. Eron vitse-prezidenti Is’hoq Jahongiriy Yaqin Sharq mintaqasidagi mamlakatlarning mamlakatdagi norozilik namoyishlarida ishtirok etgani aniqlansa, ularga “qaqshatqich zarba” berilishini va’da qilgan. AQSh davlat departamenti esa Facebook va Twitter’ni Eron hukumati vakillarining akkauntlarini bloklashga chaqirgan.