Liviya, Marokash, Tunis, Jazoir va Mavritaniya kabi arab mamlakatlarda ko‘pxotinlilik tobora urfdan qolmoqda. Bu haqda Marokashdagi Muhammad VI nomli sotsiologiya universiteti professori Muxtor al-Harras arab dunyosida oila holati mavzusiga bag‘ishlangan forumda ma’lum qildi, deb yozmoqda “RIA Novosti”.
Olimning ma’lum qilishicha, Liviyada murakkab vaziyat va iqtisodiy sabablarga ko‘ra, ko‘pxotinlilik holatlari soni kamaydi. Tunisda esa 1975-yilda ko‘pxotinlilikni taqiqlovchi qonun qabul qilingan. Marokashda 2004-yilda bir vaqtning o‘zida bir nechta nikohdan o‘tishga to‘siq qo‘yadigan qonun qabul qilindi. Xususan, bir necha xotinga uylanishni istagan erkak bir nechta shartlarni bajarishi lozim, xususan, birinchi xotinning ruxsatini olish shartlardan biri sanaladi.
Qayd etilishicha, Jazoirda ko‘p xotinli erkaklar soni juda kam. Jamiyatda esa ko‘pxotinlilik g‘oyasi qo‘llab-quvvatlanmaydi. Mavritaniyada ko‘pxotinlilik jamiyatning muayyan qatlamlari orasidagina keng tarqalgan.
Olimning aytishicha, ko‘pgina arab davlatlarida ko‘pxotinlilik o‘z dolzarbligini yo‘qotayotganining sababi sifatida erkaklarning bugungi kunda barcha xotinlari va bolalarini teng darajada ta’minlay olmasligi ko‘rsatilmoqda.
Arab ayollari orasida esa ko‘pxotinlilikning adolatsizligi, bunday holatlarda ko‘pincha ayollar va bolalar huquqlari buzilishi haqidagi fikr tobora keng ommalashmoqda.
Ta’kidlanishicha, Mag‘ribdagi arab davlatlarida erkaklar hali ham o‘z ayollarining ishlashini qabul qila olmaydi. Ushbu davlatlarda oilalarning uchdan bir qismida ayolning ishlashi er bilan kelishmovchiliklarga sabab bo‘ladi. Mintaqaning eng feministik mamlakati hisoblanadigan Tunisda aynan shu turdagi kelishmovchiliklar ko‘proq uchraydi.
Izoh (0)