Andijon shahridagi ko‘p qavatli uylardan birida qo‘lbola usulda tayyorlangan gazni tortish moslamasida yuzaga kelgan chaqnash natijasida yong‘in sodir bo‘lgani haqida xabar berilgan edi.
Mavzuga doir: Andijonda ko‘p qavatli uyda portlash yuz berdi. Hodisa oqibatida 8 kishi kasalxonaga yotqizildi (video)
Hokimlik xabariga ko‘ra, ko‘p qavatli uyning portlashi natijasida jami 6 ta xonadon zarar ko‘rgan bo‘lib, asosan yong‘in kelib chiqishi taxmin qilinayotgan 2-qavatdagi 37, 38, 39-xonadonlar zararlangan. Uyning 4-podyezdi qavatlaridagi beton to‘siqlar qulab tushgan.
Ma’lum qilinishicha, 8 kishi qo‘rquv natijasida viloyat tez-tibbiy yordam shifoxonasiga yotqizilgan. Ular ayni paytda shifokorlar nazoratida. Hodisa oqibatida kuyish va halok bo‘lish holatlari qayd etilmagan.
Favqulodda vaziyatlar vazirligi tomonidan ma’lum qilinishicha, yong‘in 38-xonadonda tabiiy gaz portlashi oqibatida yuzga kelgan. Portlashga gazning sizib chiqishi sabab bo‘lgani aytilmoqda. Hodisa yuz bergan vaqtda mazkur xonadonda hech kim bo‘lmagan. Yuqori va pastki qavatda yashovchilar hech qanday jarohat olmagan, faqat ularning ba’zilari qo‘rqqan.
Voqea joyiga viloyat hokimi Shuhrat Abdurahmonov yetib borgan va zudlik bilan mutasaddi tashkilotlarga yuzaga kelgan zararni qoplash, fuqarolarga ijtimoiy yordam ko‘rsatish yuzasidan topshiriq bergan. Yong‘indan putur yetgan joylarni qayta tiklash ishlari boshlandi.
Hodisa yuz bergan joyga favqulodda vaziyatlar vazirining birinchi o‘rinbosari boshchiligida tezkor guruh yo‘l olgan.
Izoh (0)