Андижон шаҳридаги кўп қаватли уйлардан бирида қўлбола усулда тайёрланган газни тортиш мосламасида юзага келган чақнаш натижасида ёнғин содир бўлгани ҳақида хабар берилган эди.
Мавзуга доир: Андижонда кўп қаватли уйда портлаш юз берди. Ҳодиса оқибатида 8 киши касалхонага ётқизилди (видео)
Ҳокимлик хабарига кўра, кўп қаватли уйнинг портлаши натижасида жами 6 та хонадон зарар кўрган бўлиб, асосан ёнғин келиб чиқиши тахмин қилинаётган 2-қаватдаги 37, 38, 39-хонадонлар зарарланган. Уйнинг 4-подъезди қаватларидаги бетон тўсиқлар қулаб тушган.
Маълум қилинишича, 8 киши қўрқув натижасида вилоят тез-тиббий ёрдам шифохонасига ётқизилган. Улар айни пайтда шифокорлар назоратида. Ҳодиса оқибатида куйиш ва ҳалок бўлиш ҳолатлари қайд этилмаган.
Фавқулодда вазиятлар вазирлиги томонидан маълум қилинишича, ёнғин 38-хонадонда табиий газ портлаши оқибатида юзга келган. Портлашга газнинг сизиб чиқиши сабаб бўлгани айтилмоқда. Ҳодиса юз берган вақтда мазкур хонадонда ҳеч ким бўлмаган. Юқори ва пастки қаватда яшовчилар ҳеч қандай жароҳат олмаган, фақат уларнинг баъзилари қўрққан.
Воқеа жойига вилоят ҳокими Шуҳрат Абдураҳмонов етиб борган ва зудлик билан мутасадди ташкилотларга юзага келган зарарни қоплаш, фуқароларга ижтимоий ёрдам кўрсатиш юзасидан топшириқ берган. Ёнғиндан путур етган жойларни қайта тиклаш ишлари бошланди.
Ҳодиса юз берган жойга фавқулодда вазиятлар вазирининг биринчи ўринбосари бошчилигида тезкор гуруҳ йўл олган.
Изоҳ (0)