Ichki ishlar vaziri o‘rinbosari Aziz Ikromov: Odamlarni norozi qiladigan madaniyatsiz xodimlarga safimizda o‘rin yo‘q

O‘zbekiston ichki ishlar vaziri o‘rinbosari, general-mayor Aziz Ikromovning 30-noyabr kuni Toshkent shahar IIBB YHXB YPX brigadasida respublika Davlat yo‘l harakati xavfsizligi xizmati xodimlari bilan uchrashdi, deya xabar bermoqda IIV YHXBB axborot xizmati.

Vazir o‘rinbosari endilikda eskicha usullarda ishlab bo‘lmasligini, hozir har bir xodimdan jonbozlik ko‘rsatish, tashabbuskor bo‘lish, tinimsiz izlanish va o‘rganish talab etilishini, buning uchun eng avvalo har bir xodimning bilim darajasi yuksak, muomala madaniyati boshqalarga o‘rnak bo‘lishi zarurligini alohida ta’kidlagan.

General-mayor Ikromov kamchiliklarga yo‘l qo‘yadigan, odamlarni sarson qilib, ularning noroziligini keltirib chiqaradigan, ijtimoiy dunyoqarashi past, saviyasiz, siyosiy dunyoqarashi tor, qolaversa, madaniyatsiz xodimlarga “safimizda o‘rin yo‘q”, deya qat’iy fikr bildirgan.

Shuningdek, vazir o‘rinbosari xodimlarning maxsus kiyim-boshlariga, orastaliklariga ham e’tibor qaratib, o‘zining tanqidiy fikrlarini bildirgan. O‘rta bo‘g‘in rahbarlar, saf bo‘linmalari komandirlari zimmasidagi vazifalarni, ularning oldiga qo‘yiladigan vazifalarni atroflicha tushuntirib, komandirlar bilan suhbatlashgan.

“Sizlarning asosiy vazifalaringizdan biri va eng muhimi — qo‘l ostingizdagi har bir xodim haqida, uning oilasi, ijtimoiy ahvoli, ruhiy holati to‘g‘risida batafsil ma’lumotga ega bo‘lish. Agar xodimning oilaviy sharoiti yaxshi bo‘lsa, uning e’tibori ishga, uning sifatiga qaratiladi”, — deb ta’kidlagan general-mayor.

Aziz Ikromov Davlat yo‘l harakati xavfsizligi xizmati xodimlari hamisha xalq ko‘z o‘ngida faoliyat olib borishini eslatib, fuqarolar ularning harakatlariga qarab butun ichki ishlar organlari faoliyatiga baho berishini qayd etib o‘tgan.

“Shuning uchun har biringiz, eng avvalo, muomala madaniyatiga qat’iy amal qilishingiz, odamlar bilan xushmuomala va ochiq, samimiy munosabatda bo‘lishingiz shart. Odamlarni sarson qilmasligingiz, qo‘pol muomalada bo‘lmasligingiz, aksincha, ularga imkon darajasida barcha sharoitlarni yaratib berishingiz, beg‘araz va samimiy yordam qo‘lini cho‘zishingiz kerak. Ana shunda odamlar sizdan rozi bo‘ladi”, — deb aytgan u.