Ички ишлар вазири ўринбосари Азиз Икромов: Одамларни норози қиладиган маданиятсиз ходимларга сафимизда ўрин йўқ

Ўзбекистон ички ишлар вазири ўринбосари, генерал майор Азиз Икромовнинг 30 ноябрь куни Тошкент шаҳар ИИББ ЙҲХБ ЙПХ бригадасида республика Давлат йўл ҳаракати хавфсизлиги хизмати ходимлари билан учрашди, дея хабар бермоқда ИИВ ЙҲХББ ахборот хизмати.

Вазир ўринбосари эндиликда эскича усулларда ишлаб бўлмаслигини, ҳозир ҳар бир ходимдан жонбозлик кўрсатиш, ташаббускор бўлиш, тинимсиз изланиш ва ўрганиш талаб этилишини, бунинг учун энг аввало ҳар бир ходимнинг билим даражаси юксак, муомала маданияти бошқаларга ўрнак бўлиши зарурлигини алоҳида таъкидлаган.

Генерал майор Икромов камчиликларга йўл қўядиган, одамларни сарсон қилиб, уларнинг норозилигини келтириб чиқарадиган, ижтимоий дунёқараши паст, савиясиз, сиёсий дунёқараши тор, қолаверса, маданиятсиз ходимларга «сафимизда ўрин йўқ», дея қатъий фикр билдирган.

Шунингдек, вазир ўринбосари ходимларнинг махсус кийим-бошларига, орасталикларига ҳам эътибор қаратиб, ўзининг танқидий фикрларини билдирган. Ўрта бўғин раҳбарлар, саф бўлинмалари командирлари зиммасидаги вазифаларни, уларнинг олдига қўйиладиган вазифаларни атрофлича тушунтириб, командирлар билан суҳбатлашган.

«Сизларнинг асосий вазифаларингиздан бири ва энг муҳими — қўл остингиздаги ҳар бир ходим ҳақида, унинг оиласи, ижтимоий аҳволи, руҳий ҳолати тўғрисида батафсил маълумотга эга бўлиш. Агар ходимнинг оилавий шароити яхши бўлса, унинг эътибори ишга, унинг сифатига қаратилади», — деб таъкидлаган генерал майор.

Азиз Икромов Давлат йўл ҳаракати хавфсизлиги хизмати ходимлари ҳамиша халқ кўз ўнгида фаолият олиб боришини эслатиб, фуқаролар уларнинг ҳаракатларига қараб бутун ички ишлар органлари фаолиятига баҳо беришини қайд этиб ўтган.

«Шунинг учун ҳар бирингиз, энг аввало, муомала маданиятига қатъий амал қилишингиз, одамлар билан хушмуомала ва очиқ, самимий муносабатда бўлишингиз шарт. Одамларни сарсон қилмаслигингиз, қўпол муомалада бўлмаслигингиз, аксинча, уларга имкон даражасида барча шароитларни яратиб беришингиз, беғараз ва самимий ёрдам қўлини чўзишингиз керак. Ана шунда одамлар сиздан рози бўлади», — деб айтган у.