Surxondaryoda 2019-yilning o‘tgan 10 oyi davomida voyaga yetmaganlar va yoshlar orasida jinoyatchilikka qarshi kurashish borasida hududdagi 1 406 ta ta’lim muassasasida va aholi orasida 9 492-marta uchrashuv va davra suhbatlari o‘tkazildi. Bu haqda viloyat IIB tomonidan o‘tkazilgan “Xotin-qizlar va voyaga yetmaganlar o‘rtasida huquqbuzarliklar profilaktikasiga qaratilgan chora-tadbirlar” mavzusidagi matbuot anjumanida ma’lum qilindi.
Surxondaryo viloyat IIB Huquqbuzarliklar profilaktikasi boshqarmasi Voyaga yetmaganlar va yoshlar o‘rtasida huquqbuzarliklarning oldini olish boshqarmasi katta inspektori Sarvar Tursunovning ma’lum qilishicha, jinoyat va huquqbuzarlik sodir etgan va tuzalish yo‘liga kirmagan to‘rt nafar voyaga yetmaganlar maxsus ta’lim muassasalariga yuborilgan.
“Ayni vaqtda 2019-yilning o‘tgan 10 oyi davomida nazoratsiz va qarovsiz qolgan hamda o‘zboshimchalik bilan uydan ketib qolgan 354 nafar bola Voyaga yetmaganlarga ijtimoiy-huquqiy yordam ko‘rsatish markaziga joylashtirilgan”, — deya Surxondaryo viloyati IIB vakili so‘zlaridan iqtibos keltirmoqda “Daryo” muxbiri.
Izoh (0)