Qashqadaryo viloyatining Qamashi tumanida yashovchi 54 yoshli ayol Bibixol Eshmirzayeva fuqarolik pasportida erkak sifatida ko‘rsatilgan. Shu boisdan ham onaxon nafaqaga chiqolmay sarson bo‘layotgani haqida xabar berilgan edi. Pensiya jamg‘armasi matbuot xizmati “Daryo”ga ushbu holat bo‘yicha izoh taqdim etdi.
Bugungi kunda Moliya vazirligi huzuridagi budjetdan tashqari Pensiya jamg‘armasi hamda O‘zbekiston Respublikasi Axborot texnologiyalari va kommunikatsiyalarini rivojlantirish vazirligining idoralararo ma’lumot almashinuvi platformasi o‘rtasida elektron axborot almashinuvi yo‘lga qo‘yilgan bo‘lib, ushbu elektron almashinuv yordamida jami 3,6 million nafar (umumiy kontingentga nisbatan 98,2%) pensiya va nafaqa oluvchining shaxsiy ma’lumotlari solishtirib chiqilgan bo‘lib, yangidan pensiya tayinlash jarayonida hududlardagi Migratsiya va fuqarolikni rasmiylashtirish bo‘linmasidagi jismoniy shaxslarning indentifikatsiya raqamlari va pasport ma’lumotlari “Pensiya” dasturiy ta’minotida ko‘rinadi.
O‘zbekiston Respublikasining “Fuqarolarning davlat pensiya ta’minoti to‘g‘risida”gi qonunining 121-moddasida umumiy belgilangan yoshni bir yilga qisqartirilgan holda pensiya olish huquqi tartibga solingan bo‘lib, bunga ko‘ra ushbu qonun 37-moddasining “a”, “b”, “v” va “g” bandlarida nazarda tutilgan kamida yigirma yillik ish staji bo‘lgan ayollar ellik to‘rt yoshga to‘lganda pensiya olish huquqiga ega bo‘ladi.
Demak mazkur qonun talabiga ko‘ra, bir yil oldin ya’ni, 54 yoshidan pensiya tayinlash uchun avvalo fuqaroning jinsi “ayol” bo‘lishi kerak va undan keyingi talabi bo‘yicha kamida 20 yillik mehnat stajiga ega bo‘lishi zarurdir.
Yuqoridagi qonun talablari hamda idoralararo elektron axborot almashinuvi yo‘lga qo‘yilganligi bois, fuqaro Bibixol Eshmirzayevaning fuqarolik pasportida jinsiga oid ma’lumotlari noto‘g‘ri (“ayol” o‘rniga “erkak”) yozilganligi sababli 54 yoshdan pensiya tayinlash imkoni yo‘qligi haqida Pensiya jamg‘armasining Qamashi tuman bo‘limi tomonidan fuqaroga tegishli tushuntirishlar berilgan.
Shundan keyin, fuqaro Bibixol Eshmirzayeva bir necha marotaba Qamashi tuman Migratsiya va fuqarolikni rasmiylashtirish bo‘limiga murojaat qilishiga qaramay, fuqarolik pasportidagi jinsiga oid ma’lumotlari to‘g‘rilab berilmaganligi natijasida pensiyaga chiqa olmayotganligini bildirib, “Daryo” tahririyatiga ushbu masalada amaliy yordam berishlarini so‘rab murojaat qilgan.
Fuqaroning mazkur murojaatidan keyin Pensiya jamg‘armasi Qamashi tumani bo‘limi xodimlari yordamida Qamashi tuman Migratsiya va fuqarolikni rasmiylashtirish bo‘limiga murojaat qilingan va shu yilning 26-noyabr kuni fuqarolik pasportidagi xato-kamchilik bartaraf etilib, shu kunning o‘zida fuqaro Bibixol Eshmirzayevaga yoshga doir (54 yoshidan) imtiyozli pensiya tayinlandi.
Avvalroq Qashqadaryo viloyatining Qamashi tumanida yashovchi 54 yoshli ayol Bibixol Eshmirzayeva fuqarolik pasportida erkak sifatida ko‘rsatilgan. Shu boisdan ham onaxon nafaqaga chiqolmay sarson bo‘layotgani haqida xabar berilgan edi. Qamashi tuman hokimligi ushbu holatga munosabat bildirib, ayolning pasportidagi xatolik to‘g‘rilanganini ma’lum qilgan edi.
Izoh (0)