Қашқадарё вилоятининг Қамаши туманида яшовчи 54 ёшли аёл Бибихол Эшмирзаева фуқаролик паспортида эркак сифатида кўрсатилган. Шу боисдан ҳам онахон нафақага чиқолмай сарсон бўлаётгани ҳақида хабар берилган эди. Пенсия жамғармаси матбуот хизмати «Дарё»га ушбу ҳолат бўйича изоҳ тақдим этди.
Бугунги кунда Молия вазирлиги ҳузуридаги бюджетдан ташқари Пенсия жамғармаси ҳамда Ўзбекистон Республикаси Ахборот технологиялари ва коммуникацияларини ривожлантириш вазирлигининг идоралараро маълумот алмашинуви платформаси ўртасида электрон ахборот алмашинуви йўлга қўйилган бўлиб, ушбу электрон алмашинув ёрдамида жами 3,6 миллион нафар (умумий контингентга нисбатан 98,2%) пенсия ва нафақа олувчининг шахсий маълумотлари солиштириб чиқилган бўлиб, янгидан пенсия тайинлаш жараёнида ҳудудлардаги Миграция ва фуқароликни расмийлаштириш бўлинмасидаги жисмоний шахсларнинг индентификация рақамлари ва паспорт маълумотлари «Пенсия» дастурий таъминотида кўринади.
Ўзбекистон Республикасининг «Фуқароларнинг давлат пенсия таъминоти тўғрисида»ги қонунининг 121-моддасида умумий белгиланган ёшни бир йилга қисқартирилган ҳолда пенсия олиш ҳуқуқи тартибга солинган бўлиб, бунга кўра ушбу қонун 37-моддасининг «а», «б», «в» ва «г» бандларида назарда тутилган камида йигирма йиллик иш стажи бўлган аёллар эллик тўрт ёшга тўлганда пенсия олиш ҳуқуқига эга бўлади.
Демак мазкур қонун талабига кўра, бир йил олдин яъни, 54 ёшидан пенсия тайинлаш учун аввало фуқаронинг жинси «аёл» бўлиши керак ва ундан кейинги талаби бўйича камида 20 йиллик меҳнат стажига эга бўлиши зарурдир.
Юқоридаги қонун талаблари ҳамда идоралараро электрон ахборот алмашинуви йўлга қўйилганлиги боис, фуқаро Бибихол Эшмирзаеванинг фуқаролик паспортида жинсига оид маълумотлари нотўғри («аёл» ўрнига «эркак») ёзилганлиги сабабли 54 ёшдан пенсия тайинлаш имкони йўқлиги ҳақида Пенсия жамғармасининг Қамаши туман бўлими томонидан фуқарога тегишли тушунтиришлар берилган.
Шундан кейин, фуқаро Бибихол Эшмирзаева бир неча маротаба Қамаши туман Миграция ва фуқароликни расмийлаштириш бўлимига мурожаат қилишига қарамай, фуқаролик паспортидаги жинсига оид маълумотлари тўғрилаб берилмаганлиги натижасида пенсияга чиқа олмаётганлигини билдириб, «Дарё» таҳририятига ушбу масалада амалий ёрдам беришларини сўраб мурожаат қилган.
Фуқаронинг мазкур мурожаатидан кейин Пенсия жамғармаси Қамаши тумани бўлими ходимлари ёрдамида Қамаши туман Миграция ва фуқароликни расмийлаштириш бўлимига мурожаат қилинган ва шу йилнинг 26 ноябрь куни фуқаролик паспортидаги хато-камчилик бартараф этилиб, шу куннинг ўзида фуқаро Бибихол Эшмирзаевага ёшга доир (54 ёшидан) имтиёзли пенсия тайинланди.
Аввалроқ Қашқадарё вилоятининг Қамаши туманида яшовчи 54 ёшли аёл Бибихол Эшмирзаева фуқаролик паспортида эркак сифатида кўрсатилган. Шу боисдан ҳам онахон нафақага чиқолмай сарсон бўлаётгани ҳақида хабар берилган эди. Қамаши туман ҳокимлиги ушбу ҳолатга муносабат билдириб, аёлнинг паспортидаги хатолик тўғриланганини маълум қилган эди.
Изоҳ (0)