28 ноябрь, пайшанба куни Ўзбекистон бош вазири Абдулла Арипов раислигида аҳоли ва ижтимоий соҳа объектларини энергоресурслар — газ ва электр энергия билан таъминлашдаги муаммоларга бағишланган видеоселектор йиғилиши бўлиб ўтгани ҳақида хабар берилганди.
«Xabar.uz»нинг ёзишича, йиғилишда Ўзбекистон Республикаси бош прокурори Ниғматилла Йўлдошев газ ва электр энергия таъминотидаги талон-торожликлар ҳақида ахборот берган.
Бош прокурорнинг маълум қилишича, жойларда газ, электр энергия таъминоти масаласида муаммо кўп. Аҳолини энергоресурслар билан узлуксиз таъминлашда турли ғирромликлар ҳам тўсиқ бўлмоқда. Кейинги бир ҳафтада 41 та ҳолатда 28 миллиард сўмлик табиий газ талон-торож қилингани аниқланган. Бу борада 240 та жиноий иш очилган.
«Бу шармандали ҳолат. Оммавий ахборот воситалари, интернет-нашрлар ва ижтимоий тармоқларда бу ҳақда аҳолининг ҳақли эътирозлари кенг ёритилмоқда. Газ ва электр энергия етказиб берувчилар ўз ишларига масъулият билан қарашмаяпти. Мутасадди раҳбарлар шунча салбий ҳолатларга бирон марта оммавий ахборот воситалари орқали тушунтириш ёки асосли жавоб бергани йўқ», — деган эди Абдулла Арипов Ўзбекистоннинг турли ҳудудларида кузатилаётган электр таъминотидаги узилишлар ҳақида гапириб.
Изоҳ (0)