Samarqand shahridagi “Bog‘ishamol Garden” majmuasida “Jahon palov chempionati” o‘tkazildi. Bu haqda Turizmni rivojlantirish qo‘mitasi matbuot xizmati ma’lum qildi.
Chempionatda O‘zbekiston oshpazlar uyushmasining xalqaro musobaqalarda g‘olib bo‘lgan yosh oshpazlari ham ishtirok etdi.
Musobaqa davomida turkcha osh, Xorazm, Samarqand, Toshkent, Jizzax, Andijon, Farg‘ona, Qashqadaryo oshi kabi 10 xil turdagi palov pishirilib, g‘oliblar aniqlandi.
Musobaqada mahoratli oshpazlar Fayzulla Abdullayev “Bayram”, Ismatilla Islomov “Samarqandcha” va Akrom Obidov “Choyxona” oshini mahorat bilan tayyorlab, g‘oliblar qatoridan o‘rin oldi.
O‘zbek palovining xilma-xil turlari va betakror lazzatini dunyoga namoyish etish maqsadida tashkil etilgan tadbir horijiy mehmonlar e’tirofiga sazovor bo‘ldi.
Ma’lumot uchun, BMTning Butunjahon sayyohlik tashkilotiga ko‘ra, har uchinchi sayyoh borayotgan davlatining milliy oshxonasini sayohat qilish uchun motivatsiya deb hisoblaydi va umumiy xarajatlarning tahminan 30 foizini ovqatlanishga sarflaydi.
Izoh (0)