Бугунги кунда Ўзбекистонда тез ёрдам тизимида икки ярим мингга яқин Nissan, Hyundai, Toyota, русумли ва бошқа замонавий тез ёрдам машиналари аҳолига хизмат кўрсатмоқда.
Соғлиқни сақлаш вазирлиги матбуот хизматининг хабар беришича, айни пайтда тез ёрдам автопаркини янада замонавийлаштириш ишлари тизимли давом этмоқда.
2021 йилгача Damas автомашиналаридан тўлиқ воз кечилиб, халқаро андазалар даражасида жиҳозланган замонавий тиббий ёрдам машиналарига ўтилади. 2019 йил якунига қадар барча тез ёрдам машиналарида қулай алоқани, чақириқлар учун машинани тезкор йўналтиришни таъминловчи GPS тизимини тўлиқ йўлга қўйиш белгиланган.
2016 йилда чақириқлар сони 7,2 миллионни ташкил қилган бўлса, жорий йилнинг ўтган даврида эса мурожаатлар сони тўққиз миллиондан ошган.
Шу билан бирга, шошилинч тиббий ёрдам хизматининг стационар муассасаларига ҳам мурожаатлар кўпаймоқда. Жумладан, 2017—2019 йилларда ушбу шифо масканларига 7,5 миллиондан зиёд бемор мурожаат қилган. Улардан 2,5 миллион нафари стационар, 5 миллиондан ортиғи эса амбулатор тиббий ёрдамдан баҳраманд бўлган. Стационарда даволанган беморларнинг 500 мингдан ортиғига юқори технологияли жарроҳлик амалиётлари бажарилган.
Ноябрь ойи бошида тез ёрдам Damas’лари ўрнига Ford машиналари қўйилиши маълум бўлган эди. Кейинроқ 11,9 миллион доллар қийматидаги «Тошкент шаҳрида тез тиббий ёрдам хизмати фаолиятига замонавий ахборот-коммуникация технологияларини жорий этиш» лойиҳаси доирасида Хитойнинг Henan Costar Group компанияси томонидан замонавий ахборот коммуникация технологиялари ва тиббий асбоб-ускуналар билан жиҳозланган 150 та Ford русумли тез тиббий ёрдам реанимобили Ўзбекистонга етказиб берилиши ҳақида хабар берилган эди.
Изоҳ (0)