O‘zbekiston salohiyatini namoyon etish va investorlarni jalb etish maqsadida 27-noyabr, chorshanba kuni Londonda xalqaro UzInvest forumi bo‘lib o‘tmoqda.
UzInvest forumi O‘zbekiston Investitsiyalar va tashqi savdo vazirligi bilan hamkorlikda Adam Smith Conferences va Eurasian Investor kabi London kompaniyalari tomonidan tashkil etildi. Unda Yevropa investorlari va biznes soha vakillari ishtirok etmoqda.
Forumda shuningdek, yirik amaldor va siyosatchilar, xususan, Investitsiyalar va tashqi savdo vaziri o‘rinbosari Laziz Qudratov, Moliya vaziri o‘rinbosari Odilbek Isoqov, Kapital bozorini rivojlantirish agentligi direktori Otabek Nazirov, Davlat aktivlarini boshqarish agentligi direktori Sunnatilla Bekenovdan tashkil topgan O‘zbekiston delegatsiyasi ishtirok etmoqda.
Adam Smith Conferences’ning yangi biznesni kuzatish va rivojlantirish bo‘yicha direktori Aysa Apak ushbu forumni “Davosdagi Butunjahon iqtisodiy forumining o‘zbekcha ekvivalenti” deya baholadi.
“Korzinka.uz” bosh direktori, O‘zbekistondagi iste’mol mahsulotlarining zamonaviy chakana savdosi asoschisi Zafar Hoshimov O‘zbekistondagi xususiy sektorning o‘sish dinamikasi va tadbirkorlikka nisbatan oshib borayotgan e’tibor va qiziqish haqidagi ma’ruzasi bilan chiqish qiladi. Shuningdek, ushbu forum davomida Universal Bank kengashi raisi Anvar Irchayev, Silk Capital boshqaruvchi direktori Sardor Qo‘shnazarov, Cambridge Learning Centers rahbari Jahongir Po‘latov, Khan Academy Uzbekistan loyihasi hamasoschisi Umidjon Ishmuhammedov hamda Home Show brendi asoschisi Aziz Nuriddinov chiqish qiladi.
Eurasian Investor asoschisi Esfandiyar Batmanxelij UzInvest forumining o‘tkazilishi O‘zbekistondagi iqtisodiy islohotlarning birinchi bosqichining yakuni va allaqachon boshlanishi kerak bo‘lgan keyingi bosqichning o‘ta muhim boshlanishi ekanligini aytib o‘tgan.
“Yevropalik transmilliy kompaniya va investorlar uchun imkoniyatlar aniq va ravshan — O‘zbekiston dastlabki kiruvchilarga barqaror daromad o‘sishi va uzoq yillik foydani taklif etmoqda. Shu bilan birga iqtisodiy islohotlarning ikkinchi bosqichiga o‘tish uchun ushbu davlatdagi xorijiy kompaniya va investorlar doirasini yanada kengaytirish talab etiladi. Biz esa aynan shu ikkinchi bosqichni yo‘lga qo‘yishga yordam bermoqchimiz”, — deya ta’kidlagan Esfandiyar Batmanxelij.
UzInvest forumi hamkorlaridan biri, Sturgeon Capital London investitsion kompaniyasi bosh direktori Kiyan Zandiye investorlarning O‘zbekistonga qiziqishi ortayotganini bildirdi.
“Investorlar hozirda mavjud savdo-sotiq yo‘nalishlarining kamligi, yuqori iqtisodiy islohotlarni ko‘zlagan loyiha yaratilganligi va o‘ziga xos makrodinamika natijasida kuchli iqtisodiy o‘sishga erishish mumkinligiga ahamiyat qaratishmoqda. O‘tgan yili ham bu mamlakatga qiziqishning o‘sishi kuzatilgandi. Bundan keyin ham O‘zbekiston yaratishi mumkin bo‘lgan qator imkoniyatlar sababli bu qiziqishlar oshib borishini taxmin qilyapmiz”, — deydi Kiyan Zandiye.
UzInvest forumi shaharning moliyaviy markazidan uzoq bo‘lmagan London ko‘prigi yaqinidagi tarixiy joy Glaziers Hall’da bo‘lib o‘tmoqda. Ushbu forum Adam Smith Conferences va Eurasian Investor tomonidan O‘zbekistondagi iqtisodiy o‘sishni rivojlantirishni qo‘llab-quvvatlash va investitsiyalarni jalb qilishga qaratilgan tadbirlarning dastlabkisidir.
Izoh (0)