Joriy yilning 9-sentabr kuni ijtimoiy tarmoqlarda Andijon viloyati Shahrixon tumani “Qum” mahallasi ahlining murojaati e’lon qilingan. Unda aytilishicha, tumanning mazkur mahallasida “Obod mahalla” dasturi doirasida amalga oshirilgan bunyodkorlik ishlari jarayonida davlat hisobidan ajratilgan mablag‘lar mutasaddi idoralar rahbarlari tomonidan o‘zlashtirib olingan. Andijon viloyati hokimligi matbuot xizmati mazkur xabarlarga munosabat bildirdi.
Ma’lum qilinishicha, mahallada 5,3 kilometr uzunlikda yangi elektr tarmog‘i tortilgan va buning uchun 530 million so‘m sarflangan. Shuningdek, mahalladagi bir dona suv qudug‘ini to‘la ta’mirlash uchun 120 million so‘m sarflangan.
Qayd etilishicha, 1295 metr yo‘lda 216,4 million so‘mlik asfalt ta’mirlash, 768,8 million so‘mlik shag‘al yotqizish ishlari amalga oshirilgan.
Shuningdek, mahalla hududida bir kilometrli yangi yerusti elektr tarmog‘i tortilib, bir dona yangi transformator o‘rnatish uchun 130,6 million so‘m, 1,7 kilometrli yerusti elektr tarmog‘ini rekonstruksiya qilish uchun 130,5 million so‘m, 3,1 kilometrli yerusti elektr tarmog‘ini mukammal ta’mirlash, to‘rt dona mavjud transformator punktini mukammal ta’mirlash uchun 6,2 million so‘m sarf qilingan.
Bundan tashqari, hududdagi 15-umumta’lim maktabi hamda Navoiy nomidagi qishloq vrachlik punkti binosini rekonrstruksiya qilish tadbirlari to‘liq tugatilgan. Bu ishlar uchun mos ravishda 2,17 milliard so‘m va 520 million so‘m sarflangan.
Hokimlik tomonidan ta’kidlanishicha, dastur doirasida qishloq aholisiga 526 dona maishiy gaz balloni yetkazib berilgan. “Shifobaxsh qum” davolanish maskanining eski binolari o‘rniga yangi zamonaviylari qurilgan va foydalanishga topshirildi. Dastur doirasida barpo etilgan 7 ta bozor infratuzilma obyektida ayni vaqtda savdo yo‘lga qo‘yilgan.
Qayd etilishicha, o‘rganishlar natijasida aholi tomonidan bayon etilgan shikoyatlarning asossiz tarqatilgani isbotini topgan.
Izoh (0)