Жорий йилнинг 9 сентябрь куни ижтимоий тармоқларда Андижон вилояти Шаҳрихон тумани «Қум» маҳалласи аҳлининг мурожаати эълон қилинган. Унда айтилишича, туманнинг мазкур маҳалласида «Обод маҳалла» дастури доирасида амалга оширилган бунёдкорлик ишлари жараёнида давлат ҳисобидан ажратилган маблағлар мутасадди идоралар раҳбарлари томонидан ўзлаштириб олинган. Андижон вилояти ҳокимлиги матбуот хизмати мазкур хабарларга муносабат билдирди.
Маълум қилинишича, маҳаллада 5,3 километр узунликда янги электр тармоғи тортилган ва бунинг учун 530 миллион сўм сарфланган. Шунингдек, маҳалладаги бир дона сув қудуғини тўла таъмирлаш учун 120 миллион сўм сарфланган.
Қайд этилишича, 1295 метр йўлда 216,4 миллион сўмлик асфальт таъмирлаш, 768,8 миллион сўмлик шағал ётқизиш ишлари амалга оширилган.
Шунингдек, маҳалла ҳудудида бир километрли янги ерусти электр тармоғи тортилиб, бир дона янги трансформатор ўрнатиш учун 130,6 миллион сўм, 1,7 километрли ерусти электр тармоғини реконструкция қилиш учун 130,5 миллион сўм, 3,1 километрли ерусти электр тармоғини мукаммал таъмирлаш, тўрт дона мавжуд трансформатор пунктини мукаммал таъмирлаш учун 6,2 миллион сўм сарф қилинган.
Бундан ташқари, ҳудуддаги 15-умумтаълим мактаби ҳамда Навоий номидаги қишлоқ врачлик пункти биносини реконрструксия қилиш тадбирлари тўлиқ тугатилган. Бу ишлар учун мос равишда 2,17 миллиард сўм ва 520 миллион сўм сарфланган.
Ҳокимлик томонидан таъкидланишича, дастур доирасида қишлоқ аҳолисига 526 дона маиший газ баллони етказиб берилган. «Шифобахш қум» даволаниш масканининг эски бинолари ўрнига янги замонавийлари қурилган ва фойдаланишга топширилди. Дастур доирасида барпо этилган 7 та бозор инфратузилма объектида айни вақтда савдо йўлга қўйилган.
Қайд этилишича, ўрганишлар натижасида аҳоли томонидан баён этилган шикоятларнинг асоссиз тарқатилгани исботини топган.
Изоҳ (0)