Sankt-Peterburgda o‘zbekistonlik fuqaro kaltaklanib, bank kartasidan pullarini boshqa kartaga o‘tqazishga majbur qilindi. Bu haqda “Fontanka.ru” xabar bermoqda.
Xabarda aytilishicha, 25-noyabr, dushanba kuni politsiyaga o‘zbekistonlik fuqaro murojaat qilib, 3 kun avval 34 yoshli vatandoshini 3 nafar noma’lum shaxs gaplashib olish uchun kulrang “VAZ” mashinasiga o‘tqazib, noma’lum tomonga olib ketganini aytgan.
Aniqlanishicha, ular jabrlanuvchini o‘rmonga olib kelib kaltaklagan va to‘pponcha bilan qo‘rqitib, pul talab qilgan. Shundan so‘ng jabrlanuvchini “Prospekt bolshevikov” metro stansiyasiga olib kelishgan va uning telefoni parolini bilib olib, plastik kartasidagi 36 ming rublni (taxminan 550 dollar) boshqa birovning kartasiga o‘tkazib olgan.
Shundan so‘ng talonchilar telefonni ham olib, jabrlanuvchini boshqa metro stansiyasi yonida qoldirib ketgan.
Qayd etilishicha, keltirilgan zarar 46 ming rubl (taxminan 700 dollar)ga baholanmoqda. Politsiya voqea yuzasidan tekshiruvni boshlagan, jinoiy ish qo‘zg‘atish masalasi hal etilmoqda.
Izoh (0)