Санкт-Петербургда ўзбекистонлик фуқаро калтакланиб, банк картасидан пулларини бошқа картага ўтқазишга мажбур қилинди. Бу ҳақда «Fontanka.ru» хабар бермоқда.
Хабарда айтилишича, 25 ноябрь, душанба куни полицияга ўзбекистонлик фуқаро мурожаат қилиб, 3 кун аввал 34 ёшли ватандошини 3 нафар номаълум шахс гаплашиб олиш учун кулранг «ВАЗ» машинасига ўтқазиб, номаълум томонга олиб кетганини айтган.
Аниқланишича, улар жабрланувчини ўрмонга олиб келиб калтаклаган ва тўппонча билан қўрқитиб, пул талаб қилган. Шундан сўнг жабрланувчини «Проспект болшевиков» метро станциясига олиб келишган ва унинг телефони паролини билиб олиб, пластик картасидаги 36 минг рублни (тахминан 550 доллар) бошқа бировнинг картасига ўтказиб олган.
Шундан сўнг талончилар телефонни ҳам олиб, жабрланувчини бошқа метро станцияси ёнида қолдириб кетган.
Қайд этилишича, келтирилган зарар 46 минг рубль (тахминан 700 доллар)га баҳоланмоқда. Полиция воқеа юзасидан текширувни бошлаган, жиноий иш қўзғатиш масаласи ҳал этилмоқда.
Изоҳ (0)