AQSh Davlat departamenti Prezident Shavkat Mirziyoyev so‘nggi vaqtlarda ayrim mutasaddilar va OAV vakillari o‘rtasida kuzatilgan ziddiyatli holatlarga e’tibor qaratib, rahbarlarni xalq va OAV bilan muloqotda kibrga berilmaslikka chaqirgani haqidagi gaplariga munosabat bildirdi.
Janubiy va Markaziy Osiyo masalalari bo‘yicha AQSh davlat kotibining yordamchisi vazifasini bajaruvchi Alise Uells o‘zining Twitter’dagi sahifasida shunday yozadi:
“Prezident Shavkat Mirziyoyev O‘zbekistonda ommaviy axborot vositalariga nisbatan tahdidlarni qoralayotgani va OAV erkinligiga sodiqligini yana bir bor ta’kidlaganidan xursandman. Jurnalistlar va blogerlarning xavfsiz bo‘lishi hamda erkin ishlashini ta’minlash demokratiya va ochiqlikning yanada o‘sishiga turtki beradi”.
Pleased to hear President Mirziyoyev condemn threats against the media in #Uzbekistan and reiterate his strong commitment to #MediaFreedom. Ensuring that journalists & bloggers are safe and free to do their jobs will help #Openness and #Democracy to grow only stronger. AGW
— State_SCA (@State_SCA) November 23, 2019
Prezident Shavkat Mirziyoyev 22-noyabr kuni qishloqlar va shaharlarda aholini uy-joy bilan ta’minlashning yangi tizimini joriy etish bo‘yicha amalga oshiriladigan chora-tadbirlar muhokamasiga bag‘ishlangan videoselektor yig‘ilishida barcha amaldorlarni OAVni qat’iy hurmat qilish, ular bilan doimiy hamkorlik qilish va kibru havoga berilmaslikka chaqirgandi.
Ma’lumot uchun, 16-noyabr kuni internetda Toshkent shahar hokimi Jahongir Ortiqxo‘jayevning jurnalistlarga go‘yoki tahdid qilayotganini tasdiqlovchi 1,5 daqiqalik audioyozuv tarqalgan edi. Keyinroq ushbu tahdidlar “Kun.uz” muxbirlariga qaratilgani, audioyozuv hokim va jurnalistlarning 15-avgust kuni — Olmazor tumani hokimi sobiq o‘rinbosari Abdurasul Vahobov masalasida bo‘lib o‘tgan uchrashuvida yozib olingani ma’lum bo‘ldi.Shundan so‘ng, 18-noyabrga o‘tar kechasi “Kun.uz” jamoasi va hokim Jahongir Ortiqxo‘jayev o‘rtasida uchrashuv bo‘lib o‘tdi; “Kun.uz” uchrashuv yakunlariga ko‘ra “tushunmovchilikka barham berilgani”ni ma’lum qildi (bu holat jamoatchilikning keskin noroziligiga sabab bo‘ldi). 19-noyabr kunihokim ovozi yozilgan audioning 14 daqiqalik, 20-noyabrda 17 daqiqalik talqinlari e’lon qilindi — ularda hokim jurnalistlarga ularni sharmanda qilish va o‘ldirtirib yuborish bilan tahdid qilganidan so‘ng: “Men bunday ifloslik qilmayman”, deb aytgani ma’lum bo‘ldi.
Jahongir Ortiqxo‘jayevning so‘zlari nafaqat mahalliy faollar, balki xalqaro kuzatuvchilar tomonidan ham qoralandi.
Izoh (0)