O‘zbekistonga noqonuniy olib kirilgan 100 mingdan ortiq pirotexnika vositalari yo‘q qilindi (foto)

O‘zbekiston Davlat bojxona qo‘mitasi tomonidan pirotexnika vositalarini respublika hududiga olib kirishga va noqonuniy savdosiga qarshi qator tadbirlar amalga oshirildi. Bu haqda “Daryo”ga qo‘mita matbuot xizmati xabar berdi.

Jumladan, Davlat bojxona qo‘mitasi Kontrabanda va bojxona qonunchiligi buzilishiga qarshi kurashish boshqarmasi xodimlari tomonidan Toshkent viloyati Zangiota tumanida o‘tkazilgan tezkor tadbirda A.A. ismli shaxs hech qanday hujjatlari bo‘lmagan, xorijda ishlab chiqarilgan 67 290 dona pirotexnika vositalarini noqonuniy sotayotgan vaqtda qo‘lga olingan.

Mazkur holat yuzasidan Davlat bojxona qo‘mitasi tomonidan Jinoyat kodeksining tegishli moddasi bilan jinoyat ishi qo‘zg‘atilib, tergov organiga yuborilgan.

Shuningdek, qo‘mitaning, boshqarma xodimlari Buxoro viloyatida ro‘yxatdan o‘tgan mas’uliyati cheklangan jamiyat nomiga olib kelingan yog‘och mahsulotlari orasiga yirik miqdordagi pirotexnika vositalari va biofaol qo‘shimchalar yashirilganligini aniqlab, mazkur holat yuzasidan bojxona organlari tomonidan jinoyat ishi qo‘zg‘atilgan.

Jinoyat ishlari bo‘yicha Toshkent shahar Olmazor tuman sudi hukmiga muvofiq umumiy qiymati 4 milliard 200 million so‘mdan ortiqni tashkil etuvchi 102 118 dona pirotexnika vositalari hamda 5 613 dona sifati kafolatlanmagan biofaol qo‘shimchalar Buxoro viloyati bojxona boshqarmasi xodimlari hamda tegishli idoralar vakillari bilan hamkorlikda belgilangan tartibda yo‘q qilingan.

Vazirlar Mahkamasining “O‘zbekiston Respublikasi hududida pirotexnika vositalari aylanishini tartibga solish chora-tadbirlari to‘g‘risida”gi qarori bilan pirotexnika vositalarini noqonuniy aylanishining oldini olish, iste’molchilarning huquqlarini himoya qilinishini ta’minlash maqsadida O‘zbekiston hududida litsenziyasiz pirotexnika vositalarini olib kirish, ishlab chiqarish, tashish, saqlash, sotish va ulardan foydalanish taqiqlangan.

Shundan kelib chiqqan holda, Ma’muriy javobgarlik to‘g‘risidagi kodeksning 185-1-moddasi bilan pirotexnika buyumlarini qonunga xilof ravishda ishlab chiqarish, tayyorlash, saqlash, tashish, jo‘natish, ulardan foydalanish, xuddi shuningdek, ularni qonunga xilof ravishda O‘zbekistonga olib kirganlik yoki o‘tkazganlik uchun ma’muriy javobgarlik belgilangan bo‘lib, huquqbuzarlik ashyolarini musodara qilib, eng kam ish haqining yigirma baravarigacha miqdorda jarima solishga sabab bo‘ladi.

Agar pirotexnika buyumlarining qonunga xilof muomalasi ancha miqdorda yoki ma’muriy javobgarlik qo‘llanilganidan so‘ng sodir etilgan bo‘lsa, Jinoyat kodeksining 250-1-moddasiga ko‘ra jinoiy javobgarlik belgilangan.