Qonunchilik palatasi deputatlari ta’lim va sog‘liqni saqlashga ajratilgan mablag‘lar o‘zlashtirilmay qolganini tanqid qildi

Qonunchilik palatasi majlisida deputatlar Vazirlar Mahkamasi tomonidan taqdim etilgan O‘zbekiston Respublikasi davlat budjetining va davlat maqsadli jamg‘armalari budjetlarining 2019-yil to‘qqiz oyligidagi ijrosi to‘g‘risidagi hisobotni ko‘rib chiqdi. Bu haqda palata matbuot xizmati ma’lum qildi.

Mazkur hisobot avvalroq quyi palataning Budjet va iqtisodiy islohotlar qo‘mitasida, siyosiy partiyalar fraksiyalari hamda Ekoharakat deputatlar guruhi yig‘ilishlarida dastlabki tarzda muhokama qilingan edi.

O‘zbekiston Respublikasi davlat budjetining va davlat maqsadli jamg‘armalari budjetlarining 2019- yil to‘qqiz oyligidagi ijrosi to‘g‘risidagi hisobotni Moliya vazirining o‘rinbosari A.Haydarov taqdim etdi.

Joriy yilning to‘qqiz oyida yalpi ichki mahsulotning o‘sishi 5,7 foizni tashkil etdi. Davlat budjeti daromadlari 79,2 trillion so‘mni, xarajatlari esa 86,5 trillion so‘mni tashkil etib, yalpi mahsulotdagi ulushi tegishincha 21,9 va 23,9 foizni tashkil etgan.

Hisobot davrida tashqi savdo aylanmasi 31,6 milliard AQSh dollarini tashkil etib, o‘tgan yilning mos davriga nisbatan 37,2 foiz oshgan, eksport hajmi 13,7 milliard dollarni va import hajmi 18,0 milliard dollarni tashkil qilgan.

Xarajatlarning ijtimoiy yo‘naltirilganligi saqlab qolinib, ijtimoiy xarajatlarni moliyalashtirish uchun davlat budjetidan 45,9 trillion so‘m yoki umumiy xarajatlarning 53,2 foizi miqdorida mablag‘ sarflangan. Bu xarajatlar YaIMga nisbatan 12,7 foizni tashkil etgan.

Deputatlar hisobot davrida ta’lim tizimi muassasalarini saqlash va ularni rivojlantirish xarajatlariga ajratilgan 1 trillion 236,5 milliard, sog‘liqni saqlash sohasining ayrim tadbirlarini amalga oshirishga va boshqa maqsadlar uchun ajratilgan mablag‘larning 519,6 milliard so‘mi o‘zlashtirilmay qolganini tanqid ostiga oldi.

Hukumat hisoboti yuzasidan har bir siyosiy partiya fraksiyasi hamda O‘zbekiston Ekologik harakati deputatlar guruhi vakillari o‘z nuqtai nazarini bayon qildi.

Qizg‘in muhokamalardan so‘ng Oliy Majlis Qonunchilik palatasi davlat budjetining va davlat maqsadli jamg‘armalari budjetlarining 2019-yil to‘qqiz oyligidagi ijrosi to‘g‘risidagi hisobotni tasdiqlash yuzasidan qaror qabul qildi.