Sodiq Safoyev boshchiligidagi O‘zbekiston delegatsiyasi Italiyada muhim kelishuvlarga erishdi

Oliy Majlis Senati raisining birinchi o‘rinbosari Sodiq Safoyev boshchiligidagi O‘zbekiston delegatsiyasi rasmiy tashrif bilan Italiyada bo‘lib turibdi. Bu haqda Senat matbuot xizmati ma’lum qildi.

Tashrif chog‘ida O‘zbekiston ishbilarmon doiralari vakillari Italiyaning qator kompaniyalari mutasaddilari bilan uchrashuvlar o‘tkazib, muhim kelishuvlarga erishdi.

Delegatsiya a’zolari dastlab “Pablisis Grupp” kompaniyasi bilan hamkorlik imkoniyatlarini muhokama qildi.

Uchrashuvda kompaniya prezidenti Anjelo Bayochchi so‘nggi uch yilda O‘zbekistonda amalga oshirilayotgan iqtisodiy islohotlar natijalariga yuqori baho berdi. Shuningdek, Anjelo Bayochchi O‘zbekistonning jahon sivilizatsiyasida alohida o‘rin tutuvchi boy madaniy-ma’naviy merosiga alohida urg‘u berib, bu borada G‘arb va Osiyo davlatlari bo‘ylab keng targ‘ibot ishlarini o‘tkazish taklifini bildirdi. O‘zbekistonda bo‘layotgan o‘zgarishlardan jahon hamjamiyatini doimiy xabardor qilib borish, mamlakatning ijobiy imijini shakllantirish va nufuzini oshirishda dunyoning yetakchi OAVlari va yirik media tuzilmalari bilan hamkorlik qilish masalalarida “Pablisis Grupp” kompaniyasi har qanday ko‘makka tayyor ekani ta’kidlandi.

Bundan tashqari, delegatsiya a’zolari “Inzakt” kompaniyasi ta’sischisi va boshqaruvchisi David Ronkaloni bilan uchrashdi.

Muhokamalar chog‘ida tomonlar O‘zbekistonda oziq-ovqat xavfsizligini yanada mustahkamlash, qishloq xo‘jaligi ishlab chiqarishini izchil rivojlantirish, ekologik toza mahsulotlar ishlab chiqarishni kengaytirish, agrar sektorning eksport salohiyatini oshirish masalalarida o‘zaro fikr almashdi.

David Ronkaloni O‘zbekistonda yetishtirilayotgan meva-sabzavot va oziq-ovqat mahsulotlarini sertifikatlash va eksportni targ‘ib qilish, buning uchun taqiqlangan kimyoviy va genetik modifikatsiyalangan organizmlardan (GMO) mahsulotlarning “tozaligini” tasdiqlovchi murakkab bosqichli laboratoriya tadqiqotlari tizimini joriy etishda hamkorlikka shay ekanini bildirdi.

Muzokaralar yakunida tomonlar o‘zaro hamkorlik munosabatlarini yo‘lga qo‘yish va rivojlantirish yuzasidan “Yo‘l xaritasi”ni ishlab chiqish hamda kelishilgan maqsadlarni amalga oshirish borasida kelishib oldi.