Joriy yilning 10 oyi davomida poytaxtda turli sohalarda noqonuniy ravishda ishlayotgan 148 ming 710 nafar fuqaro faoliyati qonuniylashtirildi. Bu haqda Toshkent shahar soliq boshqarmasi matbuot xizmati “Daryo”ga xabar berdi.
Natijada soliq bazasi kengayib, budjetga qo‘shimcha 12,2 milliard so‘m jalb etildi.
Ushbu raqamlar sohalar kesimida tahlil etilganida ishlab chiqarish sohasida 57 ming 500 nafar, qurilishda 18 ming 900 nafar, chakana savdoda 18 ming 300 nafar, umumiy ovqatlanish korxonalarida 7 ming nafar, xizmat ko‘rsatishda 6 ming 900 nafar va boshqa sohalarda ishlayotgan 40 ming nafardan ziyod fuqaro jismoniy shaxslarning daromad solig‘i to‘lovchisi sifatida ro‘yxatdan o‘tkazilgan.
Toshkent shahar davlat soliq xizmati organlari tomonidan o‘tkazilgan nazorat tadbirlarida Yashnobod tumani, S.Mashhadiy ko‘chasi 6-uyda joylashgan umumiy ovqatlanish shoxobchasida 15 nafar fuqaro mehnat shartnomasi tuzmasdan ishlayotgani aniqlandi.
Shuningdek, poytaxtning Olmazor tumani Beruniy ko‘chasida joylashgan savdo do‘koni faoliyati o‘rganilganida, davlat soliq xizmati organlariga taqdim etilgan hisobotlarda ko‘rsatilmagan 12 nafar fuqaro norasmiy ravishda ishlayotgani ma’lum bo‘ldi.
Izoh (0)