Andijon viloyatida aholi, shu jumladan, yoshlar o‘rtasida kompyuter texnologiyalari va Internet jahon axborot tarmog‘idan samarali foydalanishni tashkil etish chora-tadbirlari to‘g‘risida hukumat qarori qabul qilindi. Bu haqda “Huquqiy axborot” kanali xabar berdi.
Qarorga muvofiq, Andijon viloyati tuman (shahar)larida yuridik shaxs tashkil etmagan holda dasturiy mahsulotlar va axborot texnologiyalari texnologik parki direksiyasining tarkibiy bo‘linmasi shaklida raqamli texnologiyalar o‘quv markazlari tashkil etildi.
Yoshlarga kompyuter dasturlash tillarini, robototexnika, axborot texnologiyalari va elektron tijorat asosida innovatsion tadbirkorlik asoslarini o‘rgatish markazlarning asosiy vazifalaridan biridir. Shuningdek, viloyat umumta’lim maktablarida kompyuter texnologiyalari, kompyuter o‘yinlari va kibersport bo‘yicha to‘garaklar tashkil etiladi.
To‘garaklarning asosiy vazifasi yoshlarning bo‘sh vaqtlarida kibersport hamda axborot texnologiyalariga qiziqishini oshirish, ushbu sohada ularga kasbiy ko‘nikmalar berish kabilardan iborat.
Qarorga ko‘ra, markazlar yetakchi o‘quv muassasalarining malakali mutaxassis, ekspertlarini o‘quv mashg‘ulotlarini o‘tkazish uchun shartnoma asosida jalb qiladi. Markazlarda yoshlar uchun qisqa muddatli bepul hamda chuqurlashtirilgan uzoq muddatli pulli o‘quv kurslari tashkil etiladi.
Markazlarda davlat organlari va tashkilotlar xodimlari uchun ham pulli malaka oshirish kurslari tashkil etiladi.
Avvalroq 2019-yilning sentabr oyidan, ya’ni yangi o‘quv yilidan boshlab umumiy maktablarning 8-sinf o‘quvchilariga geografiya fani innovatsion darslik yordamida o‘tilishi haqida xabar berilgandi.
Izoh (0)