Сурия ҳукумати дунё жамоатчилиги эътиборини Анқаранинг мамлакат шимоли-шарқидаги тажовузкор ҳаракатларни давом эттираётгани ва Остона ҳамда Сочи келишувларига амал қилмаётганига қаратди. Бу ҳақда «ТАСС» хабар берди.
«Сурия араб республикаси ҳужум уюштираётган Туркия ҳарбийларининг жиноий ҳаракатларини, мамлакат халқига нисбатан зулм ўтказаётганини қоралайди ва жаҳон ҳамжамиятини Анқаранинг ушбу зўравонлигини тўхтатишга чақиради», — дейилади Сурия ТИВ баёнотида.
Сурия ТИВ баёнотига кўра, Туркия Остона ҳамда Сочида имзоланган келишувларга риоя қилмаган ҳолда ҳарбий жиноятларни амалга оширишда давом этмоқда. Ушбу ҳаракатлар халқаро қонунчилик ва инсон ҳуқуқларига амал қилинмаётганини англатади.
Мавзуга доир:
9 октябрда Анқара Сурия шимоли-шарқида Туркиядаги қочоқлар учун хавфсиз зона ташкил этиш мақсадида «Сурия демократик кучлари» курд жангарилари ва ИШИД террорчиларига қарши «Тинчлик булоғи» ҳарбий операциясини бошлаган. Дунё давлатлари туркларнинг ушбу ҳаракатларини қоралаган. АҚШ Туркияга қарши санкциялар қўллади.
17 октябрда Анқара ва Вашингтон Сурия шимоли-шарқидаги операцияни курдлар хавфсиз зона ҳудудидан чиқиб кетиши учун 120 соатга тўхтатишни келишиб олди ва санкциялар бекор қилинди.
22 октябрда Сочида Россия президенти Владимир Путин ва Туркия давлат раҳбари Ражаб Тоййиб Эрдўғон Сурия ҳудудидаги нотинч вазиятни муҳокама қилди ва «Тинчлик булоғи» операциясини 23 октябрдан яна 150 соатга тўхтатиш ва ўт очмаслик ҳақидаги шартлашув муддати якунига етгач ҳамкорликда Туркия—Сурия чегарасида 30 километрлик ҳудудни барпо этиш учун қўшма патрул тадбирлари ўтказиш ҳақида меморандум имзолади.
1 ноябрда курдларнинг Туркия чегарасидан 30 километр узоқликка чекингани ва улар тарк этган ҳудудни Сочида имзоланган меморандумга мувофиқ Сурия қўшинлари ва Россия ҳарбий полицияси эгаллаши маълум бўлди. 5 ноябрда Туркия ҳамда Россия ҳарбийлари Сурия шимолидаги Айн-ал-Араб аҳоли пунктидаги (Кобани) иккинчи қўшма патрул тадбирларини бошлади. 10 ноябрда Туркия президенти Ражаб Тоййиб Эрдўғон ҳамда Россия президенти Владимир Путин телефон орқали суҳбат қилиб, Суриядаги низоларни ҳал этиш борасида ўзаро фикр алмашган. Россия Туркия келишувига мувофиқ икки давлат ҳарбийлари Сурия шимоли-шарқида жами 8 та қўшма патрул тадбирлари ўтказган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)