“O‘zbekiston 24” telekanalida efirga uzatilgan partiya vakillari nomzodlarining saylovoldi chiqishlariga bag‘ishlangan ko‘rsatuvda Oliy Majlis Qonunchilik palatasidagi O‘zLiDeP fraksiyasi a’zosi Rasul Kusherbayev tadbirkorning xususiy mulk daxlsizligi haqidagi savoliga javob berdi.
“Keyingi paytlarda ayrim mutasaddi tashkilotlar tomonidan qonunlarimizga bepisand bo‘lish oqibatida nafaqat mahalliy, balki chet ellik investorlarning ham bizga investitsiya olib kirishi va tadbirkorlarning o‘z mulkiy huquqini himoya qilishiga ishonchsizlik sezilmoqda. Mulk huquqi daxlsizligi bo‘yicha partiya o‘z oldiga qanday maqsadlarni qo‘ygan?”, — deya savol berdi tadbirkor Sanjar Kumushov.
“Xususiy mulk daxlsizligini ta’minlash masalasida shu vaqtga qadar qanday muammo bo‘lgan bo‘lsa, qaysidir mansabdor shaxslar, hokimlarning o‘zboshimchaligi bilan bu ishlar yuz bergan bo‘lsa, biz buni qoralaganmiz hamda imkon doirasida ushbu holatlarga nisbatan qonuniy choralar ko‘rishni hukumatdan talab qilib kelganmiz. Bundan buyon ham shu yo‘ldan og‘ishmaymiz. Biz shunday hisoblaymizki, bir tadbirkorning asossiz ravishda mulki buziladigan bo‘lsa, partiya oyoqqa turadi. Va bu o‘z-o‘zidan bizning 750 ming a’zomizning joyi buzilayotgani sifatida baholanishi kerak.
Biz hech kimning uyi, joyi, mulki qonuniy asosga ega bo‘lmasdan turib buzilishiga yo‘l qo‘ymaslik tarafdorimiz va bundan keyin ham hukumatdan buni qat’iy talab qilamiz. Har qanaqa holatda xususiy mulk bilan bog‘liq bunday holatlar faqatgina sud orqali hal etilishi kerak, degan g‘oyani ilgari suramiz”, — deydi Kusherbayev.
Izoh (0)