Surxondaryolik nogironligi bo‘lgan ayol ishsizligidan shikoyat qildi. Tuman hokimligi uning mart oyida ishga joylashtirilganini ma’lum qildi

Ijtimoiy tarmoqlarda Surxondaryo viloyatida yashovchi fuqaro Sevara Mamarajabovaning murojaati e’lon qilindi.

Murojaatda fuqaro imtiyozli kredit asosida yangi uy olgani, o‘zi 1-guruh nogironi ekani, kasbi tikuvchi ekani, shu uyga to‘lash uchun ish bilan ta’minlashlarini iltimos qilib, tuman hokimiga bir necha marotaba murojaat qilgan bo‘lsa-da natija bo‘lmaganini aytadi. Surxondaryo viloyati hokimligi matbuot xizmati ushbu holat yuzasidan bayonot berdi.

Qayd etilishicha, Qiziriq tumani “Yetimqum” MFY Islom Karimov nomli ko‘cha 1-uyda yashovchi, 1994-yilda tug‘ilgan Sevara Mamarajabovaga 2018-yilda imtiyozli kredit asosida yangi uy-joy berilgan bo‘lib, uning boshlang‘ich to‘lovi tuman hokimligi tomonidan homiylik asosida to‘liq to‘lab berilgan.

Imtiyozli kreditni bosqichma-bosqich to‘lab borishi uchun fuqaroga “Qiziriq paxta tozalash” AJ tomonidan bir dona tikuv mashinasi berilib, kasanachi-tikuvchi sifatida ishga qabul qilingan.

Ammo keyinchalik ushbu jamiyat o‘z faoliyatini to‘xtatganligi sababli tuman kasaba uyushmasi tomonidan Sevara Mamarajabovaga bir dona kir yuvish mashinasi olib berilgan. Tuman yo‘llardan foydalanish unitar korxonasi bilan tuzilgan mehnat shartnomasiga muvofiq fuqaro 2019-yilning 26-martidan 31-dekabrigacha bo‘lgan muddatga kasanachi-tikuvchi siftida ishga qabul qilingan.