«Ўзбекистон 24» телеканалида эфирга узатилган партия вакиллари номзодларининг сайловолди чиқишларига бағишланган кўрсатувда Олий Мажлис Қонунчилик палатасидаги ЎзЛиДеП фракцияси аъзоси Расул Кушербаев тадбиркорнинг хусусий мулк дахлсизлиги ҳақидаги саволига жавоб берди.
«Кейинги пайтларда айрим мутасадди ташкилотлар томонидан қонунларимизга беписанд бўлиш оқибатида нафақат маҳаллий, балки чет эллик инвесторларнинг ҳам бизга инвестиция олиб кириши ва тадбиркорларнинг ўз мулкий ҳуқуқини ҳимоя қилишига ишончсизлик сезилмоқда. Мулк ҳуқуқи дахлсизлиги бўйича партия ўз олдига қандай мақсадларни қўйган?», — дея савол берди тадбиркор Санжар Кумушов.
«Хусусий мулк дахлсизлигини таъминлаш масаласида шу вақтга қадар қандай муаммо бўлган бўлса, қайсидир мансабдор шахслар, ҳокимларнинг ўзбошимчалиги билан бу ишлар юз берган бўлса, биз буни қоралаганмиз ҳамда имкон доирасида ушбу ҳолатларга нисбатан қонуний чоралар кўришни ҳукуматдан талаб қилиб келганмиз. Бундан буён ҳам шу йўлдан оғишмаймиз. Биз шундай ҳисоблаймизки, бир тадбиркорнинг асоссиз равишда мулки бузиладиган бўлса, партия оёққа туради. Ва бу ўз-ўзидан бизнинг 750 минг аъзомизнинг жойи бузилаётгани сифатида баҳоланиши керак.
Биз ҳеч кимнинг уйи, жойи, мулки қонуний асосга эга бўлмасдан туриб бузилишига йўл қўймаслик тарафдоримиз ва бундан кейин ҳам ҳукуматдан буни қатъий талаб қиламиз. Ҳар қанақа ҳолатда хусусий мулк билан боғлиқ бундай ҳолатлар фақатгина суд орқали ҳал этилиши керак, деган ғояни илгари сурамиз», — дейди Кушербаев.
Изоҳ (0)