Livan sobiq moliya vaziri hukumat rahbarligi uchun nomzodini qo‘ymaslikka qaror qildi

Livan sobiq moliya vaziri Muhammad Safadiy mamlakat bosh vaziri bo‘lish uchun o‘z nomzodini qo‘ymaslikka qaror qildi va iste’fo bergan hukumatning sobiq rahbari Sa’d Haririy o‘z lavozimiga qaytishiga umid qilmoqda. Bu haqda “RIA Novosti” xabar berdi.

15-noyabrda Livan tashqi ishlar vaziri vazifasini bajarayotgan Jebran Basil Safadiyning siyosatchilar o‘zaro kelishib olsa, bosh vazir lavozimini egallashga rozi bo‘lishini ma’lum qilgan. Sobiq moliya vazirining nomzodi hukumat rahbarligiga tavsiya qilinishi norozilik namoyishlarini bostirish uchun qilingan harakat edi.

Safadiyning o‘z nomzodini olganiga asosiy sabab qilib, mamlakatdagi barcha siyosiy kuchlar bilan kelishib ishlay oladigan hukumat tuza olishga ko‘zi yetmayotganligini ko‘rsatdi. Shuningdek, u iste’foga chiqqan Sa’d Haririyning yana bosh vazir lavozimiga qaytishiga umid qilishini ta’kidladi.

Safadiy siyosiy faoliyatini Tripolida sunniylar bloki deputati sifatida boshlagan. 2008-yilda milliy iqtisodiyot vaziri, 2011-yilda moliya vaziri lavozimlarida ishlagan.

Livanda xalqning norozilik namoyishlari 17-oktabrda boshlangan, 29-oktabrda bosh vazir Sa’d Haririy va uning koalitsion hukumati iste’foga chiqdi. Endi norozilik bildirayotgan xalq parlamentning tarqatib yuborilishi va saylovlar qayta o‘tkazilishini talab qilmoqda. Avvalroq Moliya vazirligi sobiq rahbari Muhammad Safadiy respublikada hukumat rahbariga aylanishi mumkinligi xabar qilingandi.