Ливан собиқ молия вазири ҳукумат раҳбарлиги учун номзодини қўймасликка қарор қилди

Ливан собиқ молия вазири Муҳаммад Сафадий мамлакат бош вазири бўлиш учун ўз номзодини қўймасликка қарор қилди ва истеъфо берган ҳукуматнинг собиқ раҳбари Саъд Ҳаририй ўз лавозимига қайтишига умид қилмоқда. Бу ҳақда «РИА Новости» хабар берди.

15 ноябрда Ливан ташқи ишлар вазири вазифасини бажараётган Жебран Басил Сафадийнинг сиёсатчилар ўзаро келишиб олса, бош вазир лавозимини эгаллашга рози бўлишини маълум қилган. Собиқ молия вазирининг номзоди ҳукумат раҳбарлигига тавсия қилиниши норозилик намойишларини бостириш учун қилинган ҳаракат эди.

Сафадийнинг ўз номзодини олганига асосий сабаб қилиб, мамлакатдаги барча сиёсий кучлар билан келишиб ишлай оладиган ҳукумат туза олишга кўзи етмаётганлигини кўрсатди. Шунингдек, у истеъфога чиққан Саъд Ҳаририйнинг яна бош вазир лавозимига қайтишига умид қилишини таъкидлади.

Сафадий сиёсий фаолиятини Триполида суннийлар блоки депутати сифатида бошлаган. 2008 йилда миллий иқтисодиёт вазири, 2011 йилда молия вазири лавозимларида ишлаган.

Ливанда халқнинг норозилик намойишлари 17 октябрда бошланган, 29 октябрда бош вазир Саъд Ҳаририй ва унинг коалицион ҳукумати истеъфога чиқди. Энди норозилик билдираётган халқ парламентнинг тарқатиб юборилиши ва сайловлар қайта ўтказилишини талаб қилмоқда. Аввалроқ Молия вазирлиги собиқ раҳбари Муҳаммад Сафадий республикада ҳукумат раҳбарига айланиши мумкинлиги хабар қилинганди.