Qirg‘iziston qishloq xo‘jaligi vazirligi O‘zbekistondan mahsulot olib kelishni taqiqlamoqchi

Qirg‘iziston Respublikasi qishoq xo‘jaligi, oziq-ovqat sanoati va melioratsiya vazirligi mamlakatga O‘zbekiston hududidan ayrim mahsulotlarni olib kirish taqiqlanishi mumkinligini bildirdi. Bu haqda Sputnik xabar berdi.

Vazirlik ma’lumotiga ko‘ra, yil boshidan beri Yevrosiyo iqtisodiy ittifoqi talablariga ko‘ra O‘zbekistondan kelgan yuklarni tekshirish vaqtida 356 ta qoida buzilish holati kuzatilgan, jumladan, 10 ta holatda zararlangan mahsulotlarni Qirg‘izistonga olib kirishga urinilgan.

O‘zbekistondan olib kirilayotgan anorlarda Sharq kuya kapalagi topilgan. Kuya anor, shaftoli, o‘rik, olxo‘ri, nektarin, olma, nok, behi, olcha, dafna, gilos, bodom mevalari orasida kuzatilgan. Ushbu hasharot mevaning 40 dan 100 foizgacha bo‘lgan qismini yo‘q qilishi mumkin.

Sputnik’ning xabar berishicha, ushbu mahsulotlar Qirg‘iziston chegarasidan O‘zbekiston Respublikasida o‘simliklar karantini xizmati vakolatli organi tomonidan berilgan fitosanitar sertifikati bilan o‘tkazilgan.

12-noyabrda “Dostuk” chegara postida 35 tonna xurmo, behi va no‘xatning fitosanitar sertifikat, qadoqlangan belgisiz Qirg‘istonga olib kirishga urinish holati fosh etilgandi.

“Yevrosiyo iqtisodiy ittifoqi talablari va Qirg‘iziston qonunchiligiga ko‘ra karantin nazorati ostida O‘zbekistondan mamlakatga olib kelingan mahsulotlarda sifat buzilishi holatlari kuzatilsa, ushbu tovarlarning Qirg‘izistonga olib kirilishi vaqtincha taqiqlanishi mumkin”, — deyiladi vazirlik xabarida.

Qirg‘iziston Respublikasi qishoq xo‘jaligi, oziq-ovqat sanoati va melioratsiya vazirligi O‘zbekiston qonunchiligiga ko‘ra o‘simliklar karantini xizmati vakolatli organiga tegishli xat bilan murojaat qilgan.